F6.2 شدت کے زلزلے نے ترکی کو لرزا دیا

کئی افراد گھبرا کر گھروں اور دفاتر سے باہر نکل آئے‘وزیراعظم شہبازشریف کا اظہار افسوس، امدادکی پیشکش

بدھ 23 اپریل 2025 20:45

ص*انقرہ، اسلام آباد(اُردو پوائنٹ اخبارتازہ ترین - آن لائن۔ 23 اپریل2025ء)ترکی کے شمال مغربی علاقے میں زلزلے کے شدید جھٹکے محسوس کیے گئے۔ مقامی وقت کے مطابق دوپہر 12 بج کر 49 منٹ پر آنے والے اس زلزلے کی شدت 6.2 ریکارڈ کی گئی۔وزیراعظم پاکستان محمد شہباز شریف نے زلزلے سے نقصانات پر گہرے افسوس کا اظہار کرتے ہوئے امداد کی پیش کش کی ہے۔یورومیڈیٹرین سسمولوجیکل سینٹر (EMSC) کے مطابق زلزلہ مرمرہ کے اندرونی سمندر میں، استنبول کے نواحی علاقے سیلیوری کے قریب آیا۔

زلزلے کے جھٹکے استنبول سمیت قریبی صوبوں میں بھی شدت سے محسوس کیے گئے، جس سے عوام میں خوف و ہراس پھیل گیا۔ کئی افراد گھبرا کر گھروں اور دفاتر سے باہر نکل آئے۔ترک وزیر داخلہ علی یرلیکایا نے سوشل میڈیا پر بتایا کہ زلزلے سے ممکنہ نقصانات کا جائزہ لینے کے لیے تمام متعلقہ سرکاری اداروں نے فیلڈ سروے شروع کر دیا ہے۔

(جاری ہے)

انہوں نے زلزلے سے متاثرہ شہریوں کی خیریت اور جلد صحت یابی کی دعا بھی کی۔

حکام کی جانب سے اب تک کسی جانی یا مالی نقصان کی تصدیق نہیں کی گئی۔ادھرسماجی رابطے کی ویب سائٹ ایکس پر وزیر اعظم شہباز شریف نے ترکیہ میں زلزلہ پر گہری تشویش کا اظہار کیا ہے۔ وزیراعظم نے اپنے پیغام میں کہا کہ ترک بھائیوں اور بہنوں کی سلامتی کیلئے دعا گو ہیں، پاکستان قدرتی آفت پر ہر طرح کی مدد کیلئے حاضر ہے۔