Live Updates

خیبر پختونخوا اسمبلی کی قائمہ کمیٹی برائے زراعت کا اجلاس

زرعی زمین کا غیر قانونی ہائوسنگ سوسائیٹیوں ،بڑھتی آبادیوں کی وجہ سے ختم ہونا باعث تشویش ہے ،روک تھام ضروری ہے،عبدالسلام آفریدی

جمعرات 24 اپریل 2025 18:50

پشاور(اُردو پوائنٹ اخبارتازہ ترین - این این آئی۔ 24 اپریل2025ء)خیبر پختونخوا اسمبلی کی قائمہ کمیٹی برائے زراعت کا اجلاس کمیٹی کے چیئرمین اور رکن صوبائی اسمبلی عبدالسلام آفریدی کی زیر صدارت صوبائی اسمبلی کے کانفرنس روم پشاور میں منعقدہ ہوا ۔اجلاس میںوزیر زراعت میجر ریٹائر سجاد بارکوال، اراکین قائمہ کمیٹی و ممبران اسمبلی ،، علی شاہ خان،میاں شرافت، شیر علی آفریدی اوراکرام اللہ، سمیت محکمہ زراعت کے متعلقہ حکام نے شرکت کی۔

اس موقع پر کمیٹی کے گزشتہ اجلاس میں کئے گئے فیصلوں پر عمل در آمد کا جائزہ لیا گیا۔اسی طرح زراعت کی ترقی کے لئے مختلف امور پر غورخوض کرنے کے ساتھ زرعی زمینوںکے تحفظ،موسمیاتی تبدیلیوں سے فصلوں پر پڑنے والے اثرات کی روک تھا م آبپاشی کے نظام کی بہتری اور کاشت کاری میں اضافے کے امور سے متعلق اراء و سفارشات پیش کی گئیں۔

(جاری ہے)

اجلاس سے خطاب کرتے ہوئے چیئرمین قائمہ کمیٹی برائے زراعت عبدالسلام آفریدی نے کہا کہ زرعی زمین غیر قانونی ہائوسنگ سوسائیٹیوں اور برھتی ہوئی آبادیوں کی وجہ سے ختم ہورہی ہے اور یہ باعث تشویش بات ہے اور ضرورت اس امر کی ہے کہ اس کی روک تھام کی جائے۔

انہوں نے بتایا کہ اس حوالے سے صوبے کے اضلاع سے بھی رپورٹیں مانگی گئی ہیں جو کمیٹی کے آئندہ اجلاس میں پیش کی جائیںگی ۔ اسی طرح اسٹیبلشمنٹ،لوکل گورنمنٹ اور زراعت کے محکموں سے بھی آئندہ اجلاس میں بریفنگ دینے کی تاکید کی گئی ہے۔انہوں نے کہا کہ زرعی اراضی کے تحفظ کے لئے بہر صورت سخت اقدامات اٹھاتے ہوئے قانون سازی کی جائیگی۔ پہلے سے جو قوانین موجود ہیں لیکن ان پر اگرعمل درآمد نہیں ہو رہا تو ان پر عمل دآمد یقینی بنایا جائے گا ۔

انہوں نے کہا کہ پاکستان ایک زرعی ملک ہے لیکن بد قسمتی سے بہتر پلاننگ نہ ہونے کے باعث یہاں خوراک کم پڑ جاتی ہے۔ چیئرمین کمیٹی ک کا مزید کہنا تھا کہ آئندہ اجلاس میں زرعی اراضی ، ایگریکلر ایکٹ اور زراعت کے دیگرمتعلقہ قونین سے متعلق تفصیلی بریفنگ لی جائے گی تاکہ پیش کردہ رپورٹ کی روشنی میںسفارشات پر عمل در آمد کرتے ہوئے زرعی زمین کو بچایا جا سکے۔انہوں نے کہا کہ زیر زمین پانی کی مقدار کم ہو رہی ہے جو آنے والی نسلوں کے لئے نقصان دہ ہے اس لئے ضروری ہے کہ ٹیوبویلوں کی بجائے سمال ڈیم، چیک ڈیم، اور بارش کے پانی کے تالاب بنانے کی جانب توجہ دی جائے جس کے باعث زیر امین پانی کی سطح بھی برقرار رہے گی۔