پاکستانی سفارتخانے کے زیراہتمام پیرس میں یوم پاکستان استقبالیہ، سفیر ممتاز زہرا بلوچ نے پاک۔ فرانس تعلقات کی اہمیت کو اجاگر کیا

پیرس (اُردو پوائنٹ اخبارتازہ ترین - اے پی پی۔ 24 اپریل2025ء) فرانس میں پاکستان کے سفارتخانے نے پیرس میں یوم پاکستان کی مناسبت سے استقبالیہ کا اہتمام کیا جس میں فرانسیسی حکومت کے عہدیداران، منتخب نمائندوں، عسکری حکام ، ماہرین تعلیم، تاجروں اور میڈیا کی بڑی تعداد نے شرکت کی۔ پیرس میں مقیم بین الاقوامی اداروں بشمول یونیسکو اور او ای سی ڈی کے سینئر عہدیداروں اور فرانس میں مقیم سفارتی برادری نے بڑی تعداد میں شرکت کی۔

پاکستان میں فرانس کے سفیر نکولس گیلے بھی تقریب میں موجود تھے۔ پاکستانی سفارتخانہ کی جانب سے جاری بیان کے مطابق تقریب کا آغاز پاکستان اور فرانس کے قومی ترانوں سے ہوا اور ایک دستاویزی فلم دکھائی گئی جس میں پاکستان کے ورثے، ثقافت، کھانوں، فنون اور دستکاری کو پیش کیا گیا تھا۔

(جاری ہے)

اس موقع پر سفیر اور معزز مہمانوں نے یوم پاکستان کا خصوصی کیک کاٹا۔

سینیٹ میں خارجہ امور، دفاع اور مسلح افواج کے کمیشن کے نائب صدر سینیٹر راچد تیمل اور فرانس پاکستان فرینڈ شپ گروپ کے رکن اور سفیر ڈیوڈ برٹولوٹی، ڈپٹی سیکرٹری جنرل وزارت یورپ و خارجہ امور نے مہمانوں سے خطاب کیا۔ انہوں نے یوم پاکستان کے موقع پر پاکستان کی حکومت اور عوام کو مبارکباد دی۔ انہوں نے پاکستان فرانس تعلقات کی اہمیت کو اجاگر کیا اور خاص طور پر اقتصادی میدان میں زبردست صلاحیت کو اجاگر کیا۔

مہمانوں کا خیرمقدم کرتے ہوئے فرانس میں پاکستان کی سفیر ممتاز زہرا بلوچ نے پاکستان کے صدیوں پرانے کثیر النسل، کثیر الثقافتی اور کثیر لسانی ورثے اور ایک جمہوری، ترقی پسند پاکستان کے مزاج کو برقرار رکھنے کے عزم کے بارے میں بتایا۔ انہوں نے بتایا کہ گزشتہ کئی دہائیوں میں پاکستان نے جمہوری اداروں کو مضبوط کیا ہے، عدلیہ کو بااختیار بنایا ہے اور انسانی حقوق کے فروغ اور خواتین کو بااختیار بنانے کے لیے تاریخی قانون سازی کی ہے۔

سفیر ممتاز زہرا بلوچ نے دنیا بھر کے لوگوں کے ساتھ پاکستان کی بھرپور یکجہتی کا اظہار کیا جو ظلم اور استعمار کا سامنا کر رہے ہیں۔ انہوں نے پاکستان کی خارجہ پالیسی کے اہم خدوخال کا خاکہ پیش کیا جس کی جڑیں بین الاقوامی قانون اور تنازعات کے پرامن حل میں پیوست ہیں۔ انہوں نے کہا کہ بین الاقوامی کشمکش کے وقت، پاکستان نے بات چیت اور سفارت کاری اور اقوام متحدہ کے چارٹر کی مرکزیت کو ترجیح دی۔

یہ ترجیحات اقوام متحدہ کی سلامتی کونسل کے غیر مستقل رکن کے طور پر پاکستان کے کردار کی بھی وضاحت کرتی ہیں۔ سفیر نے پاکستان فرانس تعلقات کی اہمیت کے بارے میں بتایا جو باہمی احترام اور شراکت داری پر مبنی ہیں۔ انہوں نے اس بات پر زور دیا کہ سٹریٹجک خودمختاری، کثیرالجہتی اور بین الاقوامی قانون کو برقرار رکھنے والے دو ممالک کے طور پر، پاکستان اور فرانس اقوام متحدہ اور دیگر بین الاقوامی اداروں میں امن، ترقی اور موسمیاتی کارروائی کے لیے مل کر کام کر رہے ہیں۔

انہوں نے مزید کہا کہ وزیراعظم محمد شہباز شریف اور فرانس کے صدرصدر ایمانوئل میکرون کے درمیان طے پانے والی مفاہمت نے دونوں ممالک کے درمیان دوطرفہ تعلقات کو مثبت رفتار کار دی ہے۔ تقریب میں نمائش کے لیے رکھیا گیا ''فاسٹنگ بدھا'' کا ریپلیکا مہمانوں کے لیے توجہ کا مرکز بنا رہا اور ساتھ ہی پاکستان پر متعدد کتابوں کی نمائش بھی منعقد کی گئی۔