Live Updates

بھارتی جارحیت کا منہ توڑ جواب، پی ایس ایل کی براڈ کاسٹ کمپنی میں شامل بھارتی عملہ بے دخل

پی ایس ایل 10 میں براڈ کاسٹ کمپنی میں شامل 23 بھارتی شہریوں کو واہگہ بارڈر کے راستے بھارت روانہ کر دیا گیا

ذیشان مہتاب ہفتہ 26 اپریل 2025 12:57

بھارتی جارحیت کا منہ توڑ جواب، پی ایس ایل کی براڈ کاسٹ کمپنی میں شامل ..

لاہور (اردو پوائنٹ تازہ ترین اخبار ۔ 26 اپریل 2025ء ) بھارت کی آبی جارحیت کا پاکستان نے منہ توڑ جواب دیتے ہوئے پاکستان میں جاری پی ایس ایل کی براڈ کاسٹ کمپنی میں شامل بھارتی عملے کو پاکستان سے بے دخل کر دیا گیا ۔

تفصیلات کے مطابق پی ایس ایل 10 میں براڈ کاسٹ کمپنی میں شامل 23 بھارتی شہریوں کو واہگہ بارڈر کے راستے بھارت روانہ کر دیا گیا ، لاہور پولیس نے براڈ کاسٹ کمپنی کے ارکان کو واہگہ بارڈر کے روایتی راستے سے بھارت بھجوا دیا، حکومت کی جانب سے بھارتی شہریوں کو فوری پاکستان چھوڑنے کی ہدایات جاری کی گئی تھیں۔

گزشتہ روز انسٹاگرام پر ایک پوسٹ شیئر کی گئی جس کے مطابق پاکستانی حکومت نے پاکستان سپر لیگ (پی ایس ایل) 10 کی نشریاتی ٹیم میں شامل تمام بھارتی شہریوں کو 48 گھنٹوں کے اندر ملک چھوڑنے کا حکم دیا تھا۔

(جاری ہے)

یہ اقدام 22 اپریل کو جموں و کشمیر کے علاقے پہگام میں ہونے والے دہشت گرد حملے کے بعد کیا گیا ہے، جس میں 26 بھارتی سیاح ہلاک ہوئے تھے، اس واقعے نے بھارت اور پاکستان کے درمیان تعلقات مزید کشیدہ کر دیے ہیں۔

حکومتی فیصلے سے 24 سے زائد بھارتی عملہ متاثر ہوا ہے، جن میں انجینئرز، کیمرہ آپریٹرز، پروڈکشن لیڈز اور پلیئر ٹریکنگ ماہرین شامل ہیں، جو پی ایس ایل 2025 کی لائیو نشریات پر کام کر رہے تھے۔

پاکستان کرکٹ بورڈ (پی سی بی) اور نشریاتی کمپنی ٹرانس ایشیا متبادل عملے کی تلاش میں سرگرم ہو گئی ہیں تاکہ میچز کا تسلسل برقرار رکھا جا سکے اور نشریات میں خلل نہ آئے۔