Live Updates

مقبوضہ جموں وکشمیر،بھارتی فورسز نے 2ہزار سے زائد کشمیری گرفتار کر لیے

ہفتہ 26 اپریل 2025 16:30

سری نگر (اُردو پوائنٹ اخبارتازہ ترین - اے پی پی۔ 26 اپریل2025ء) بھارت کے غیر قانونی زیر قبضہ جموں وکشمیر میں بھارتی فورسز نے مختلف اضلاع سے 2ہزار سے زائد کشمیریوں کو گرفتار کر لیا ہے۔کشمیرمیڈیاسروس کے مطابق فورسز نے سری نگر، گاندربل، بانڈی پورہ، کپواڑہ، بارہمولہ، بڈگام، اسلام آباد، پلوامہ، شوپیاں اور کولگام اضلاع کے مختلف علاقوں میں محاصرے اور تلاشی کی کارروائیوں اور گھروں پر چھاپوں کے دوران 2ہزار سے زائد کشمیریوں جن میں زیادہ تر نوجوان ہیں، گرفتار کر کے تھانوں اور کیمپوں میں منتقل کر دیے ہیں جہاں ان سے سخت پوچھ گچھ کی جا رہی ہے۔

فورسز نے ان میں سے 175 سے زائد افراد کو ضلع اسلام آباد کے مختلف علاقوں میں پکڑ دھکڑ کی کارروائیوں کے دوران گرفتار کیا۔بھارتی پولیس کے ترجمان نے سری نگر میں جاری ایک بیان میں کہا کہ ضلع اسلام آباد کے مختلف علاقوں میں تلاشی کی کارروائیوں اور گھروں پر چھاپوں کے دوران 175افراد کو حراست میں لیا گیا ہے۔

(جاری ہے)

انہوں نے کہا کہ ضلع بھر میں اضافی چیک پوسٹیں قائم کی گئی ہیں اور فورسز نے گشت کا سلسلہ بھی تیز کر دیا ہے۔

یاد رہے کہ22 اپریل کو پہلگام میں پیش آنے والے واقعے کے بعد بھارتی فوجیوں اور پیرا ملٹر ی اہلکاروں نے مقبوضہ وادی میں محاصرے اور تلاشی کی کارروائیوں ، گھروں پر چھاپوں اور بے گناہ کشمیریوں کی گرفتار ی کاسلسلہ تیز کر دیاہے۔بھارتی فورسز نے آزادی پسند سرگرمیوں کی پاداش میں کشمیریوں کی گھروں کی مسماری کا بہیمانہ عمل بھی شروع کر دیا ہے اور گزشتہ روز سے اب تک سات کشمیریوں کے گھر بارودی مواد کے ذریعے مسمار کر دیے گئے ہیں۔