Live Updates

مقبوضہ جموں وکشمیر،بھارتی فورسز کی محاصرے اور تلاشی کی کارروائیوں، گھروں پر چھاپوں کا سلسلہ جاری ،سینکڑوں بے گناہ نوجوان گرفتار

اتوار 27 اپریل 2025 16:25

سرینگر(اُردو پوائنٹ اخبارتازہ ترین - این این آئی۔ 27 اپریل2025ء)غیرقانونی طورپر بھارت کے زیر قبضہ جموں وکشمیرمیں بھارتی فورسز نے مختلف علاقوں میں نہتے کشمیریوں کے خلاف اپنی پرتشدد اور غیر انسانی کارروائیاں جاری رکھتے ہوئے سینکڑوں بے گناہ نوجوانوں کو گرفتارکر لیا۔کشمیر میڈیا سروس کے مطابق بھارتی فوج کی راشٹریہ رائفلز، پیراملٹری سنٹرل ریزرو پولیس فورس، پولیس کے سپیشل آپریشن گروپ اورتحقیقاتی ایجنسی این آئی اے نے وادی کے طول و عرض میں حریت پسندکشمیریوں کے گھروں پر چھاپے مارے اور تلاشیاں لیں۔

سرینگر شہر میں بٹہ مالو، صفاکدل، صورہ ، پاندچھ، بمنہ ، شالہ ٹینگ، لال بازار اور جڈی بل سمیت مختلف علاقوں میں 65سے زائد حریت پسندوں کے گھروں پر چھاپے مارے گئے اور تلاشیاں لی گئیں۔

(جاری ہے)

فورسز نے ان کاروائیوں کے دوران مکینوں کو ہراساں کیااورگھریلو سامان کی توڑپھوڑ کی جبکہ لوگوں کی نقدی اور قیمتی اشیاء لوٹ لیں۔یہ کارروائیاں بھارتی وزیر داخلہ امیت شاہ اوربھارت کے مسلط کردہ لیفٹننٹ گورنر منوج سنہا کے حکم پر کی جارہی ہے۔

عینی شاہدین نے صحافیوں کو بتایاکہ گھروں پر چھاپہ مار کارروائیوں کے دوران نوجوانوں کو گرفتار اورہراساں جبکہ گھروں کو مسمار کیا جارہا ہے تاکہ حق خودارادیت کے لئے کشمیریوں کے عزم کو توڑا جائے۔ انہوں نے بھارت کی ریاستی دہشت گردی اور علاقے کی بگرتی ہوئی صورتحال پر میڈیا کی خاموشی پرتشویش کا اظہار کیا۔اسلام آباد، شوپیاں، کولگام، پلوامہ، بڈگام، گاندربل، بارہمولہ، بانڈی پورہ اور کپواڑہ اضلاع کے مختلف علاقوں میں بھی محاصرے اورتلاشی کی کارروائیوں اورگھروں پر چھاپوں کا سلسلہ جاری ہے جبکہ عوامی نقل و حرکت پر نظر رکھنے کے لیے وادی بھر میں بھارتی فورسز کی اضافی نفری تعینات کی گئی ہے۔

اس دوران پلوامہ، اسلام آباد، بانڈی پورہ، کولگام، شوپیاں اور کپواڑہ اضلاع میں کشمیریوں کے متعدد رہائشی مکانات کو دھماکوں سے اڑا دیا گیا۔