Live Updates

:شہید لانس نائیک عثمان محمد اور شہید سپاہی عمران خان کی لازوال قربانیوں کو ہمیشہ یاد رکھا جائے گا، اسپیکر قومی اسمبلی

اتوار 27 اپریل 2025 18:45

اسلام آباد(اُردو پوائنٹ اخبارتازہ ترین - آن لائن۔ 27 اپریل2025ء)اسپیکر قومی اسمبلی سردار ایاز صادق نے خیبرپختونخوا میں مختلف کارروائیوں کے دوران 15 خوارجی دہشتگردوں کو جہنم واصل کرنے پر سیکیورٹی فورسز کو خراج تحسین اورخوارجی دہشتگردوں کا بہادری سے مقابلہ کرتے ہوئے شہید ہونے والے لانس نائیک عثمان محمد اور سپاہی عمران خان کو خراج عقیدت پیش کیاہے۔

(جاری ہے)

ایک بیان میں اسپیکر قومی اسمبلی نے شہید لانس نائیک عثمان محمد اور شہید سپاہی عمران خان کے لواحقین سے دلی تعزیت اور ہمدردی کا اظہارکیااورکہا کہ شہید لانس نائیک عثمان محمد اور شہید سپاہی عمران خان کی لازوال قربانیوں کو ہمیشہ یاد رکھا جائے گا، قوم سیکیورٹی فورسز کی لازوال قربانیوں کو کبھی فراموش نہیں کرے گی، اسپیکر قومی اسمبلی نے کہا کہ پاکستان کے بہادر سپوتوں نے وطن کے دفاع اور سلامتی کی خاطر بے مثال قربانیاں دی ہیں، پوری قوم سیکیورٹی فورسز کی جرات اور بہادری کو سلام پیش کرتی ہے، خوارجی دہشتگردوں کو اپنے انجام تک پہنچانے کیلئے سیکیورٹی فورسز کا غیر متزلزل عزم قابل ستائش ہے،قوم کو سیکیورٹی فورسز کی پیشہ ورانہ صلاحیتوں پر فخر ہے، اسپیکر قومی اسمبلی نے اللہ تعالیٰ سے شہداء کے درجات کی بلندی اور لواحقین کیلئے صبر جمیل کی دعاکی۔