Live Updates

وزیراعظم سے عالمی فنانس کمپنی ورلڈ لبرٹی فنانشل کے شریک چیئرمین کی سربراہی میں وفد کی ملاقات

پاکستان عالمی سطح پر تیزی سے کرپٹوکرنسی کو اپنانے والی معیشتوں میں سے ایک ہے ،شہبازشریف کی گفتگو ملاقات میں آرمی چیف ، اسحق ڈار، خواجہ آصف، عطا تارڑ، احد چیمہ اور متعلقہ اعلیٰ افسران بھی شریک تھے

اتوار 27 اپریل 2025 23:30

اسلام آباد(اُردو پوائنٹ اخبارتازہ ترین - این این آئی۔ 27 اپریل2025ء)وزیر اعظم شہباز شریف نے کہا ہے کہ پاکستان عالمی سطح پر تیزی سے کرپٹوکرنسی کو اپنانے والی معیشتوں میں سے ایک ہے جبکہ باصلاحیت نوجوان ملک میں کرپٹوکرنسی کے فروغ میں اہم کردار ادا کر سکتے ہیں۔تفصیلات کے مطابق وزیراعظم سے عالمی فنانس کمپنی ورلڈ لبرٹی فنانشل کے شریک چیئرمین زیک ویٹکوف کی سربراہی میں وفد نے ملاقات کی۔

ملاقات کے دوران وفد نے پاکستان میں کرپٹوکرنسی کے شعبے کی ترویج کیلئے سرمایہ کاری میں دلچسپی کا اظہار کیا۔ملاقات میں آرمی چیف جنرل عاصم منیر، نائب وزیراعظم ووزیر خارجہ اسحق ڈار، وزیر دفاع خواجہ آصف، وزیراطلاعات عطا تارڑ، وفاقی وزیر احد چیمہ اور متعلقہ اعلیٰ افسران شریک تھے۔

(جاری ہے)

اس موقع پر وزیر اعظم شہبازشریف نے کہاکہ پاکستان میں مختلف شعبوں میں سرمایہ کاری کے پرکشش مواقع موجود ہیں، پاکستان بین الاقوامی سطح پر تیزی سے کرپٹوکرنسی کو اپنانے والی معیشتوں میں سے ایک ہے۔

انہوںنے کہاکہ پاکستان کے باصلاحیت نوجوان ملک میں کرپٹوکرنسی کے فروغ میں اہم کردار ادا کر سکتے ہیں جبکہ ملک میں کرپٹوکرنسی جیسے معاشی لین دین کے متبادل طریقوں کی ترویج کے لیے قوائد و ضوابط کی تشکیل پر کام تیزی سے جاری ہے۔ورلڈ لبرٹی فنانشل کے شریک چیئرمین زیک ویٹکوف نے کہاکہ پاکستان میں قدرتی وسائل میں کے حوالے سے عالمی سرمایہ کاروں کیلئے انتہائی پرکشش مواقع موجود ہیں۔انہوںنے کہاکہ پاکستان دنیا کی تیزی سے ابھرتی ہوئی معیشتوں میں سے ایک ہے، پاکستان نہ صرف اس خطے بلکہ پوری دنیا میں سرکردہ ممالک کی صف میں شامل ہونے کی صلاحیت رکھتا ہے۔زیک ویٹکوف نے کہا کہ خطے میں اور عالمی سطح پر امن کے قیام میں پاکستان کے کلیدی کردار کو سراہتے ہیں۔