بھارت سے کشیدگی،وزیر داخلہ محسن نقوی کی فضل الرحمن اور حافظ نعیم سے ملاقات، قائدین کو اعتماد میں لیا

لاہور (اُردو پوائنٹ اخبارتازہ ترین - این این آئی۔ 29 اپریل2025ء)وفاقی وزیر داخلہ محسن نقوی نے لاہور میں جمعیت علمائے اسلام کے سربراہ مولانا فضل الرحمان اور امیر جماعت اسلامی حافظ نعیم الرحمن سے علیحدہ علیحدہ ملاقاتیں کی ہیں، وزیر داخلہ نے دینی و سیاسی جماعتوں کے قائدین کو بھارتی اقدامات پر پاکستان کے موقف اور فیصلوں پر اعتماد میں لیا اور نیشنل سکیورٹی کمیٹی کے فیصلوں سے بھی آگاہ کیا۔

تفصیلات کے مطابق وفاقی وزیر داخلہ محسن نقوی نے لاہور میں جمعیت علمائے اسلام کے سربراہ مولانا فضل الرحمن سے ملاقات کی جس میں باہمی دلچسپی کے امور ۔ پاک بھارت کشیدگی اور فلسطین مسئلے پر تبادلہ خیال کیا گیا۔محسن نقوی نے بھارتی اقدامات پر پاکستان کے موقف اور فیصلوں پر مولانا کو اعتماد میں لیا اور نیشنل سیکیورٹی کمیٹی کے فیصلوں کے بارے میں بھی آگاہ کیا۔

(جاری ہے)

مولانا فضل الرحمان نے واضح کیا کہ بھارتی وزیراعظم نریندر مودی مسلمان دشمن ہے، اسلام اور مسلمانوں کے مقابلے میں جہاں کوئی محاذ ملے گا وہاں کھڑا ہوجائے گا۔اس موقع پر محسن نقوی نے کہا کہ بھارت آگ سے کھیلنے کی کوشش کر رہا ہے، پاکستان کسی بھی مہم جوئی کا پوری قوت سے جواب دے گا۔وزیرداخلہ محسن نقوی نے مولانا فضل الرحمن کی خیریت دریافت کی اور ان کی صحت کیلئے نیک خواہشات کا اظہار بھی کیا۔

علاوہ ازیں، وفاقی وزیرداخلہ محسن نقوی نے منصورہ لاہور میں امیر جماعت اسلامی حافظ نعیم الرحمن سے ملاقات کی اور پاک بھارت حالیہ کشیدگی اور سرحدوں کی صورتحال پر تبادلہ خیال کیا۔وزیرداخلہ محسن نقوی نے حافظ نعیم الرحمن کو بھی نیشنل سیکورٹی کونسل کے فیصلوں کے بارے میں بریفنگ دی اور پاکستان کے اصولی موقف اور فیصلوں سے آگاہ کیا۔حافظ نعیم الرحمن نے بھارت کے غیر منطقی اقدامات کے تناظر میں پاکستان کے اصولی موقف کی تائید کی اور بھر پور حمایت کا یقین دلایا۔

حافظ نعیم الرحمن نے کہا کہ بھارت کے معاملے پر پوری قوم یکجا ہے، لاکھوں بے گناہ کشمیریوں کو قتل کرنے والی بھارتی سرکار کو ہوش کے ناخن لینے چاہئیں، امیر جماعت اسلامی نے فلسطین کی موجودہ صورتحال پر بھی تبادلہ خیال کیا۔محسن نقوی نے کہا کہ بھارت جان بوجھ کر سازش کے ذریعے خطے کا امن تباہ کرنے کے درپے ہے، سیاسی اکابرین اور قوم بھارت کی کسی بھی جارحیت کے خلاف یکجا ہے اور پاکستان کی بہادر مسلح افواج دفاع وطن کے لئے پوری طرح تیار ہیں۔