ایم ڈی بیت المال سینیٹر کیپٹن (ر)شاہین خالد بٹ کی وفاقی وزیر سید عمران احمد شاہ سے ملاقات، بلوچستان میں جاری اقدامات کا جائزہ لیا

منگل 29 اپریل 2025 18:59

اسلام آباد(اُردو پوائنٹ اخبارتازہ ترین - این این آئی۔ 29 اپریل2025ء)پاکستان بیت المال کے مینجنگ ڈائریکٹر سینیٹر کیپٹن (ر)شاہین خالد بٹ نے وفاقی وزیر برائے تخفیف غربت و سماجی تحفظ، سید عمران احمد شاہ سے ملاقات کی، جس میں وزیراعظم کی خصوصی ہدایت پر بلوچستان میں جاری اور آئندہ کے ترقیاتی اقدامات پر تبادلہ خیال کیا گیا۔ملاقات کے دوران وفاقی وزیر نے بلوچستان کے ویمن ایمپاورمنٹ سینٹرز کو جدید خطوط پر استوار کرنے کی ضرورت پر زور دیتے ہوئے کہا کہ ان مراکز میں روایتی مہارتوں جیسے سلائی کڑھائی کی بجائے آئی ٹی سے متعلقہ تربیت کو ترجیح دی جائے۔

انہوں نے نیشنل ووکیشنل اینڈ ٹیکنیکل ٹریننگ کمیشن (NAVTTC) کے اشتراک سے پروگرام کی ڈیجیٹلائزیشن کی ہدایت کی تاکہ خواتین کو عالمی مارکیٹ کی ضروریات سے ہم آہنگ مہارتیں فراہم کی جا سکیں۔

(جاری ہے)

وفاقی وزیر نے اعلان کیا کہ ان مراکز سے مستفید ہونے والی خواتین کی تعداد کو دگنا کیا جائے گا۔ انہوں نے وزیراعظم یوتھ پروگرام کے چیئرمین رانا مشہود سے مشاورت کی اہمیت پر زور دیا تاکہ خواتین کو بااختیار بنانے کے لیے مشترکہ اقدامات کو باقاعدہ شکل دی جا سکے۔

انہوں نے کہا کہ ہمارا ہدف ایک باصلاحیت، پراعتماد اور عالمی سطح پر مقابلہ کرنے والی خواتین کی ورک فورس تیار کرنا ہے۔مزید برآں وزیر نے مستحق افراد کے لیے میڈیکل امداد کے دائرہ کار کو بڑھانے اور بلوچستان کے طلبہ کے لیے یونیورسٹی اسکالرشپس میں نمایاں اضافہ کرنے کی ہدایت بھی دی تاکہ اعلی تعلیم تک رسائی بہتر بنائی جا سکے۔ وفاقی وزیر نے مئی کے دوسرے ہفتے میں بلوچستان یونیورسٹی کے دورے کا اعلان بھی کیا، جہاں وہ طلبہ سے ملاقات اور منصوبوں کا زمینی جائزہ لیں گے۔ انہوں نے حکومت کے شمولیتی اور ہدفی ترقیاتی وژن کا اعادہ کرتے ہوئے کہاکہ بلوچستان کی ترقی پاکستان کی خوشحالی کی ضامن ہے، اور ہم اس مقصد کے حصول کے لیے ہر ممکن اقدام کر رہے ہیں۔