Live Updates

کوئٹہ سے پہلی حج پرواز روانہ، گورنر بلوچستان نے مسافروں کو الوداع کیا

یہ سفر آپ کے ایمان کو مضبوط کرے، آپ کو اپنے معاشرے کیلئے خیر اور نیکی کا سرچشمہ بنائے، گورنر بلو چستان

منگل 29 اپریل 2025 19:53

کوئٹہ(اُردو پوائنٹ اخبارتازہ ترین - این این آئی۔ 29 اپریل2025ء)گورنربلوچستان جعفرخان مندوخیل نے کوئٹہ کے انٹرنیشنل ایئرپورٹ سے پہلی حج پرواز کے حجاج کرام کو الوداع کہنے کے موقع پر خطاب کرتے ہوئے کہا کہ آپ بہت خوش قسمت ہیں کہ کوئٹہ سے پہلی حج پرواز کے ذریعے چند گھنٹوں کا سفر طے کر کے سعودی عرب کے شہر مدینہ شریف بخیر و عافیت پہنچ جائیں گی. میں کوئٹہ سے براہ راست پروازوں کو ممکن بنانے پر پاکستان انٹرنیشنل ایئر لائنز اور دیگر تمام متعلقہ حکام کی کوششوں کو سراہتا ہوں بلاشبہ براہ راست پروازوں کے اقدامات سے بلوچستان کے عوام کو بڑی سہولت میسر آئی ہے۔

یہ بات انہوں نے کوئٹہ انٹرنیشنل ایئرپورٹ پر فریضہ حج ادا کرنے والے عازمین کو الوداع کہتے ہوئے کیا،اس موقع پر جی ایم پی آئی اے شعیب احمد، کمانڈر اے این ایف بریگیڈیئر عدنان، اے پی ایم کوئٹہ ائرپورٹ ملک وحید عباس اور ڈائریکٹر حج الیاس جعفر بھی موجود تھے۔

(جاری ہے)

اس موقع پر شرکاء سے خطاب میں گورنر بلوچستان جعفرخان مندوخیل نے کہا کہ مقدس مقامات کا یہ سفر، مسلمان کی زندگی میں ایک یادگار تجربہ ہے جس کو الفاظ میں بیان نہیں کیا جا سکتا۔

یہ روحانیت، عقیدت اور سعادت حاصل کرنے کا اہم موقع ہے انہوں نے عازمین حج پر زور دیتے ہوئے کہا کہ جب آپ اس مقدس سفر کا آغاز کرتے ہیں تو اس پورے سفر میں پاکستان اور بلوچستان کو اپنی خصوصی دعاؤں میں ضرور یاد رکھیں، گورنر مندوخیل نے دعا کی کہ یہ سفر آپ کے ایمان کو مضبوط کرے، آپ کے سفر کو آسان کرے اور آپ کو اپنے معاشرے کیلئے خیر اور نیکی کا سرچشمہ بنائے۔