سیکرٹری اوقاف کی زیرصدارت ایوان ِ اوقاف میں ’’قومی سلامتی‘‘کے موضوع پر علماء کانفرنس کا انعقاد

لاہور (اُردو پوائنٹ اخبارتازہ ترین - آن لائن۔ 30 اپریل2025ء) سیکرٹری /چیف ایڈ منسٹریٹر اوقاف پنجاب ڈاکٹر طاہر رضابخاری کی زیرصدارت ایوان ِ اوقاف میں پیغام ِ پاکستان کے ابلاغ اور بھارتی جارحیت کے خلاف پوری پاکستانی قوم متحد اور مستعدکے حوالے سے ’’قومی سلامتی و یکجہتی کانفرنس‘‘انعقاد پذیر ہوئی سیکرٹری اوقاف نے خطاب کرتے ہوئے کہا کہ محراب و منبر دفاعِ وطن سے آگاہ اور پوری قوم ملک کی حفاظت کے لیے یکجا ہے۔

بھارت خطے میں دہشت گردی سے باز رہے،وطن ِ عزیز کے چپّے چپّے کی حفاظت کریں گے۔پاک فوج، دشمن کے ناپاک عزائم کو خاک میں ملانے کی صلاحیت سے بہر ہ مند ہے۔پٴْراًمن بقائے باہمی پر یقین، لیکن دشمن کی جارحیت کونظر انداز نہیں کریں گے۔ دفاعِ وطن کیلئے دینی و سیاسی طبقات سمیت تمام شعبہ ہائے حیات کا یکجا ہونا لائق ِ تحسین ہے۔

(جاری ہے)

کانفرنس سے خطاب کرتے ہوئے ڈائریکٹر جنرل مذہبی امورخالد محمود سندھو، خطیب داتاؒ دربار مفتی محمد رمضان سیالوی، نائب مہتمم جامعہ اشرفیہ مولانا زبیر حسن،صدر نظام المدارس پاکستان میر آصف اکبر،چیئرمین امتحانات وفاق المدارس الرضویہ پاکستان مولانا ڈاکٹر مفتی محمد کریم خان اور دیگر علمائ مولانا ڈاکٹر عمران انور نظامی،انچارج دارالافتاء جامعہ نعیمیہ مفتی محمد عمران حنفی اور شیعہ مکتب فکر کے راہنمامولانا سجاد حسین جوادی نے کہا کہ محراب ومنبر ملکی استحکام کا ضامن ہے، ملکی یکجہتی کے لیے کسی قربانی سے دریغ نہیں کریں گے،علمی اور دینی قوتیں، قومی یکجہتی اور اتحادواتفاق کے فروغ میں اساسی اور کلیدی کردار ادا کرتے رہیں گے۔

دفاع وطن کے لیے پوری قوم متحد ہے۔ملکی استحکام اور قومی یکجہتی ہماری اولین ترجیح ہے،پوری قوم ملکی دفاع کے لیے افواج پاکستان کے شابہ بشانہ کھڑی ہے۔انہوں نے مزید کہا کہ پاکستان امن وسلامتی کا مرکز اور ہمسایوں کو بھی امن وسلامتی کی تلقین کرتا ہے۔وطن ِ عزیز ایک مستحکم مملکت کے طور پر دنیا میں کامیابی اور کامرانی کا سفر طے کرتا ہوا، کامیابی و کامرانی کی جانب رواں دواں،جبکہ دفاعِ وطن کی ذمہ داری پوری کرنے والے ادارے ہر سطح پر مستعد اور بیدار ہیں۔

کانفرنس کے اختتام پر خطیب داتاؒ دربار نے ملک وملت کی سربلندی، ترقی، خوشحالی، نظریاتی و جغرافیائی سرحدوں کی حفاظت، مملکت خداد کو فرقہ واریت، بین المسالک اور بین المذاہب ہم آہنگی کی فضاء برقرار رکھنے اور حقیقی اور پائیدار بنیادوں پر امن کے قیام کی غرض سے دٴْعا کروائی۔اس موقع پرعلمی،دینی اورروحانی حلقوں کی ممتاز شخصیات سمیت اوقاف آفیسران و اہلکاران، خطباء ، علماء ، مدرسین، موذنین اور خدام کی کثیر تعداد نے شرکت کی۔واضح رہے کہ سیکرٹری اوقاف کی خصوصی ہدایت پر اوقاف کے زیر اہتمام صوبہ بھر میں ضلعی و ڈویڑ نل سطح پر ’’قومی سلامتی و یکجہتی کانفرنسز‘‘ کے شایان ِ شان انعقاد کا سلسلہ جاری ہے۔