بھارتی خفیہ ایجنسی را کی ہدایات پر دہشت گرد تنظیموں کے نام تبدیل کرنے کا انکشاف

اسلام آباد ( اُردو پوائنٹ اخبارتازہ ترین۔ 01 مئی 2025ء ) بھارتی خفیہ ایجنسی را کی ہدایات پر دہشت گرد تنظیموں کے نام تبدیل کرنے کا انکشاف سامنے اگیا۔ سکیورٹی ذرائع کے مطابق پاکستان میں دہشت گردی کرنے والے خوارج کی سرپرستی بھارت کی جانب سے کی جا رہی ہے، اس حوالے سے سامنے آنے والے آڈیو کلپ میں را کا دہشت گردی کے لیے کردار ثابت ہوگیا، بھارت ہمیشہ سے خوارج کا ایک بڑا سرپرست رہا ہے جو انہیں اسٹریٹیجک رہنمائی، مالی اور مادی مدد فراہم کرتا ہے تاکہ وہ پاکستان میں اپنے ایجنٹوں کے ذریعے بدامنی اور پرتشدد کارروائیاں کریں۔

سکیورٹی ذرائع نے بتایا ہے کہ پاکستان نے بھارتی خفیہ ایجنسی را کے ملک میں دہشت گردی میں ملوث ہونے کے ٹھوس شواہد بارہا پیش کیے ہیں، خوارج گروہوں کے درمیان ہونے والی حالیہ گفتگو نے ایک بار پھر را کی جانب سے دہشت گرد گروہوں کی سرپرستی کو بے نقاب کیا ہے جنہیں پاکستان میں دہشت گردی کے لیے استعمال کیا جا رہا ہے، اس گفتگو میں افغانستان میں موجود ایک خارجی انس، شمالی وزیرستان میں موجود اپنے دوسرے دہشت گرد ساتھی ابوذَر کو یہ بتا رہا ہے کہ ایک را ایجنٹ کے کہنے پر خوارج نے پہلے سے اعلان شدہ دہشت گرد گروہ کا نام تبدیل کرنے کا فیصلہ کیا ہے۔

(جاری ہے)

سکیورٹی ذرائع نے کہا کہ آڈیو گفتگو سے پتا چلتا ہے کہ مذکورہ گروہ تحریک طالبان غزوہ ہند کہلایا جاتا تھا مگر اس کا نام بھارت مخالف ہونے کے باعث را ایجنٹس نےاسے بدلنے کا کہا، مارچ 2025 میں ’انقلابِ اسلامی پاکستان‘ (میڈیا سیل، صدائے غزو ہند) کے نام سے ایک نیا گروہ سامنے آیا جسے اپریل 2025ء میں بھارتی را کے ہینڈلر کی ہدایت پر ’اتحاد المجاہدین پاکستان‘ کا نام دیا گیا۔

سکیورٹی ذرائع سے معلوم ہوا ہے کہ اس گفتگو میں خوارج اسنائپر ہتھیاروں اور دیگر سازوسامان کی دستیابی پر بھی بات کرتے ہیں تاکہ سکیورٹی فورسز کو نشانہ بنایا جا سکے، یہ ثبوت واضح طور پر اس بات کی تصدیق کرتا ہے کہ را کو خوارج دہشت گرد گروہوں پر بڑا اثر و رسوخ حاصل ہے، ان دہشت گردوں کو افغانستان کے ذریعے پاکستان میں بدامنی اور دہشت پھیلانے کے لیے استعمال کیا جاتا ہے تاکہ مالی فوائد حاصل کیے جا سکیں جب کہ مذہب کا استعمال صرف دھوکہ دینے کے لیے کیا جاتا ہے، در حقیقت را ناصرف خوارج کو مالی اور مادی امداد فراہم کرتی ہے بلکہ عملی طور پر ان کی رہنمائی کرتی ہے اور ان کے کردار و اہداف بھی خود متعین کرتی ہے۔