Live Updates

کراچی کنگز کے ہاتھوں 87رنز سے شکست ،ملتان سلطانز پلے آف کی دوڑ سے باہر

جیمز ونس 65، عرفان خان 40اور خوشدل شاہ 33رنز بنائے ،باولنگ میں محمد نبی 3، خوشدل شاہ اور میر حمزہ نے 2،2وکٹیں حاصل کیں

جمعرات 1 مئی 2025 23:41

لاہور (اُردو پوائنٹ اخبارتازہ ترین - این این آئی۔ 01 مئی2025ء) ایچ بی ایل پی ایس ایل 10میں کراچی کنگز نے ملتان سلطانز کو 87 رنز سے شکست دے دی۔یہ کراچی کنگز کی سات میچوں میں چوتھی کامیابی ہے ۔ اس جیت کے بعد اس کے 8پوائنٹس ہوگئے ہیں ۔ ملتان سلطانز کی 8میچوں میں یہ 7ویں شکست ہے اور اگر وہ اپنے اگلے دونوں میچ جیت بھی لے تب بھی اس کے 6 پوائنٹس ہونگے یوں وہ پلے آف کی دوڑ سے باہر ہوگئی ہے۔

قذافی اسٹیڈیم لاہور میں کراچی کنگز نے ٹاس جیت کر پہلے بیٹنگ کا فیصلہ کیا اور 20اوورز میں 4وکٹوں پر 204رنز بنائے۔ملتان سلطانز 16اعشاریہ ایک اوورز میں 117رنز بناکر آئوٹ ہوگئی ۔اوپنرز ٹم سائیفرٹ اور کپتان ڈیوڈ وارنر نے کراچی کنگز کو 53رنز کا جارحانہ اسٹارٹ دیا۔ سائیفرٹ3چوکوں اور ایک چھکے کی مدد سی22رنز بناکر عبید شاہ کی گیند پر جارڈن کے ہاتھوں کیچ ہوگئے۔

(جاری ہے)

ڈیوڈ وارنر جو مائیکل بریسویل کے ایک ہی اوور میں 24رنز اسکور کرچکے تھے 2چھکوں اور4چوکوں کی مدد سی30رنز بناکر ڈیوڈ ولی کی گیند پر کامران غلام کے ہاتھوں کیچ ہوگئے۔ 60کے مجموعی اسکور پر عمیر بن یوسف صرف ایک رن بناکر عبید شاہ کی گیند پر ڈیوڈ ولی کے ہاتھوں کیچ ہوئے۔ جیمز ونس اور عرفان خان نے چوتھی وکٹ کے لیے 78 رنز کا اضافہ کیا۔ عرفان خان 3 چھکوں اور 2چوکوں کی مدد سی40رنز بناکر کیمفر کی گیند پر جارڈن کے ہاتھوں کیچ ہوئے۔

جیمز ونس جنہوں نے ملتان سلطانز کے خلاف پہلے میچ میں سنچری اسکور کی تھی اس مرتبہ انہوں نے 65رنز ناٹ آئوٹ کی اننگز کھیلی جس میں5چوکے اور 2چھکے شامل تھے۔انہوں نے خوشدل شاہ کے ساتھ پانچویں وکٹ کی شراکت میں 66 رنز کا اضافہ کیا ۔ خوشدل شاہ نے آئوٹ ہوئے بغیر صرف 13گیندوں پر 33رنز اسکور کیے جس میں2چوکے اور3چھکے شامل تھے۔عبید شاہ نے 49رنز دے کر 2وکٹیں حاصل کیں۔

ملتان سلطانز کو ابتدا ہی میں کپتان محمد رضوان کا نقصان اٹھانا پڑا جو بغیر کوئی رن بنائے عباس آفریدی کی گیند پر سائیفرٹ کے ہاتھوں کیچ ہوگئے جس کے بعد وقفے وقفے سے وکٹیں گرتی رہیں اور ملتان سلطانز اپنے ہدف سے دور ہوتی چلی گئی۔عثمان خان ایک ، یاسر خان 26کرٹس کیمفر 12افتخار احمد 8اور مائیکل بریسویل 2رنز بناکر آئوٹ ہوئے۔کامران غلام ایک چھکے اور 2چوکوں کی مدد سے 29رنز بناکر ٹاپ اسکورر رہے۔کراچی کنگز کی طرف سے محمد نبی نے 14رنز دے کر3وکٹیں حاصل کیں۔خوشدل شاہ نے 26اور میرحمزہ نے 15رنز دے کردو دو کھلاڑیوں کو آئوٹ کیا۔ملتان سلطانز اپنا 9واں میچ 5مئی کو پشاور زلمی اور 10واں میچ 11مئی کو کوئٹہ گلیڈی ایٹرز کے خلاف کھیلے گی ۔ دونوں میچز ملتان کرکٹ اسٹیڈیم میں کھیلے جائیں گے۔