Live Updates

پاکستان علاقائی امن کے لئے پرعزم ہے، کوئی غلط فہمی میں نہ رہے، بھارت کی مہم جوئی کا بھرپور جواب دیں گے، آرمی چیف جنرل سید عاصم منیر کا ٹلہ فیلڈ فائرنگ رینج کا دورہ

جمعرات 1 مئی 2025 19:50

راولپنڈی (اُردو پوائنٹ اخبارتازہ ترین - اے پی پی۔ 01 مئی2025ء) چیف آف آرمی سٹاف جنرل سید عاصم منیر نے وطن عزیز کی سلامتی اور خودمختاری یقینی بنانے کے عزم کا اظہار کرتے ہوئے کہا ہے کہ پاکستان علاقائی امن کے لئے پرعزم ہے تاہم کوئی غلط فہمی میں نہ رہے،بھارت کی مہم جوئی کا بھرپور جواب دیں گے۔جمعرات کو آئی ایس پی آر کی جانب سے جاری پریس ریلیز کے مطابق آرمی چیف سید عاصم منیر نے ٹلہ فیلڈ فائرنگ رینج کا دورہ کیا اور پاک فوج کی منگلا سٹرائیک کور کی جنگی مشقوں کا جائزہ لیا۔

یہاں پہنچنے پر کور کمانڈر نے سپہ سالار کا استقبال کیا۔ دورے کےموقع پر جوانوں سے گفتگو کرتے ہوئے آرمی چیف نے کہا کہ پاکستان علاقائی امن کے لئے پرعزم ہے اور قومی مفادات کے تحفظ کے لئے ہماری تیاریاں اور عزم غیر متزلزل ہے۔

(جاری ہے)

آرمی چیف نے افسروں اور جوانوں کے بلند حوصلے،جنگی مہارت اور جذبے کو سراہا۔بیان کے مطابق اس مشق کو جنگی تیاریوں، میدان جنگ میں ہم آہنگی اور میدان جنگ کے قریب حالات میں جدید ترین ہتھیاروں کے نظام کے آپریشنل انضمام کی توثیق کرنے کے لئے انتہائی احتیاط سے ڈیزائن کیا گیا تھا۔

روایتی میدان جنگ کے منظرنامے کے لئے لڑاکا طیارے، لڑاکا ہوا بازی کے آلات ،طویل فاصلے تک مارکرنے والے توپ خانے اور نیکسٹ جنریشن کی فیلڈ انجینئرنگ تکنیک سمیت جدید صلاحیتوں کی ایک متنوع رینج کا استعمال کیا گیا تھا۔تمام ہتھیاروں اور خدمات سے تعلق رکھنے والے فوجی جوانوں نے ہم آہنگ جارحانہ مشقوں کے دوران غیر معمولی حکمت عملی، تیز رفتاری اور ہلاکت خیزی کا مظاہرہ کیا جو تربیت اور پیشہ ورانہ مہارت کی غیر معمولی درجے کی عکاسی کرتا ہے۔

قابل ذکر بات یہ ہے کہ اس مشق میں پاک فوج کی حرکی اور غیر حرکی آپریشنل صلاحیتوں کو بڑھانے کے لئے مخصوص اور جدید ٹیکنالوجیز کے بڑھتے ہوئے استعمال کا مظاہرہ کیا گیا۔مشق ہیمر سٹرائیک پاک فوج کی سخت تربیت، نظریاتی اور تکنیکی جدت طرازی کے ذریعے مسلسل تبدیلی لانے کا ثبوت ہے۔سینئر فوجی قیادت، فارمیشن کمانڈرز اور مختلف سروسز سے تعلق رکھنے والے معززین نے ان مشقوں کا مشاہدہ کیا۔