لاہور کو کرائم انڈکس میں لندن اور نیویارک سے محفوظ شہر قرار دیا جانا اہم سنگ میل ہے

لاہور سمیت دیگر شہروں میں کرائم کی شرح میں کمی آرہی ہے، پنجاب میں سی ٹی ڈی کو فعال کردیا گیا ہے، لاہور سمیت ہر شہر کو محفوظ ترین بنائیں گے، وزیراعلیٰ مریم نوازشریف کی لاہورپولیس کو شاباش

ثنااللہ ناگرہ پیر 5 مئی 2025 19:49

لاہور کو کرائم انڈکس میں لندن اور نیویارک سے محفوظ شہر قرار دیا جانا ..

لاہور (اُردو پوائنٹ اخبارتازہ ترین۔ 05 مئی 2025ء) وزیراعلیٰ پنجاب مریم نواشریف نے لاہور میں جرائم میں کمی پر لاہور پولیس کو شاباش دی ہے۔ وزیراعلیٰ مریم نوازشریف سے آئی جی ڈاکٹر عثمان انور، سی سی پی او بلال صدیق کمیانہ، ڈی آئی جی ایڈمن عمران کشور، ڈی آئی جی آپریشنز لاہور فیصل کامران اور ڈی آئی جی انویسٹی گیشن ذیشان رضا نے ملاقات کی۔ وزیراعلیٰ مریم نوازشریف کی طرف سے پولیس ٹیم کو ظہرانہ بھی دیا گیا۔

ملاقات میں وزیراعلیٰ مریم نوازشریف نے کرائم ریٹنگ میں کمی پر پولیس کی کاوشوں کو سراہا۔ وزیراعلیٰ مریم نوازشریف نے لاہور میں جرائم میں کمی کو خوش آئند قرار دیا ہے۔وزیراعلیٰ مریم نووازشریف نے کہا کہ ہر شہری کے جان ومال کا تحفظ ریاست کی زمہ داری ہے۔ شہری امن و امان کے قیام کے لئے پولیس سے تعاون و معاونت کریں۔

(جاری ہے)

رینکنگ متعارف کرانے سے لاہور سمیت دیگر شہروں میں کرائم کی شرح میں کمی آرہی ہے۔

کرائم کا گراف نیچے آنا شاندار پولیسنگ کا نتیجہ ہے۔ وزیراعلیٰ مریم نوازشریف نے کہا کہ لاہور پولیس آپریشن ونگ کی کارکردگی کی بنیاد پر کرائم انڈکس میں لندن اور نیویارک سے محفوظ شہر قرار دیا جانا اہم سنگ میل ہے۔ کرائم فائٹنگ کی بہتر حکمت عملی کی بدولت لاہور سیف سٹی میں شامل ہوچکا ہے۔ لائن اینڈ آرڈر کے چیلنجز کے باوجود کرائم میں کمی کا ہدف پورا ہونا بہترین ٹیم ورک کا نتیجہ ہے۔

وزیراعلیٰ مریم نوازشریف نے کہا کہ سی ٹی ڈی کو فعال کردیا گیا ہے۔ لاہور سمیت ہر شہر کو محفوظ ترین بنائیں گے۔ ” کے پی آئی“ متعارف کرانے سے پولیس اور انتظامیہ کی پرفارمنس بہتر ہوئی ہے۔ جدید ٹیکنالوجی، فوری فیڈ بیک اور موثر مانیٹرنگ سے پولیسنگ کو بہتر بنایا گیا ہے۔ پولیس میں احتساب کے عمل کو یقینی بنایا گیا ہے۔ مزید برآں وزیراعلیٰ پنجاب مریم نواز شریف نے انڈیا سے واپس آنے والے مریضوں کے مفت علاج کی ہدایت کی ہے۔

حالیہ کشیدگی کے بعد انڈیا سے پاکستانی مریضوں کو علاج ادھورا چھوڑ کر واپس بھیج دیا گیا تھا۔ ٹرانسپلانٹ اور دیگر امراض میں مبتلا مریضوں کا پنجاب میں علاج یقینی بنانے کا فیصلہ کیا گیا ہے۔ وزیراعلیٰ مریم نواز شریف نے انڈیا سے ادھورے علاج کے ساتھ آنے والے مریضوں کے مفت علاج کابھی حکم دیا۔ وزیراعلیٰ مریم نوازشریف نے کہا کہ انڈیا سے آنے والے مریضوں کو تنہا نہیں چھوڑیں گے۔وزیراعلیٰ مریم نوازشریف نے محکمہ صحت کے حکام کو ہدایات جاری کردیں۔