سلامتی کونسل نے پاک بھارت کشیدگی پر گہری تشویش اور سندھ طاس معاہدے کی معطلی پر تحفظات کا اظہار کیا ہے،ترجمان دفتر خارجہ

اجلاس میں دونوں ممالک کوفوجی تصادم سے بچاو اور سفارتی راستے اپنانے کی ضرورت پر زور دیاگیاہے،سلامتی کونسل اجلاس میں خطے کی بگڑتی ہوئی سکیورٹی صورتحال اور بھارتی اشتعال انگیزی پر غور کیا گیا

فیصل علوی منگل 6 مئی 2025 13:27

سلامتی کونسل نے پاک بھارت کشیدگی پر گہری تشویش اور سندھ طاس معاہدے ..

اسلام آباد(اردوپوائنٹ اخبار تازہ ترین۔06 مئی 2025)ترجمان دفتر خارجہ کا کہنا ہے کہ اقوام متحدہ کی سلامتی کونسل نے سندھ طاس معاہدے کی معطلی پر تحفظات کا اظہار کیا ہے،اجلاس میں یواین سلامتی کونسل ارکان نے پاک بھارت کشیدگی پر گہری تشویش کا اظہار کیا اور دونوں ممالک کوفوجی تصادم سے بچاو اور سفارتی راستے اپنانے کی ضرورت پر زور دیا ہے،ترجمان دفترخارجہ کے مطابق پاکستان کی درخواست پر اقوام متحدہ کی سلامتی کونسل کا پاکستان اور بھارت کے مسئلے پر بندکمرہ اجلاس ہوا جس میں خطے کی بگڑتی ہوئی سکیورٹی صورتحال اور بھارتی اشتعال انگیزی پر غور کیا گیا۔

اجلاس میں دونوں ممالک پر سفارتی راستے اپنانے اور فوجی تصادم سے گریز کرنے پر زور دیا گیا۔ترجمان دفتر خارجہ کے مطابق پاکستان نے سیکرٹری جنرل اقوام متحدہ اور سلامتی کونسل کی ثالثی کی حمایت کرتے ہوئے کہا کہ بین الاقوامی برادری فوری طور پر ذمہ داری کا مظاہرہ کرے۔

(جاری ہے)

ترجمان دفتر خارجہ کاکہنا ہے کہ اجلاس میں پاکستانی مندوب نے بھارت کی 23 اپریل کی یکطرفہ کارروائیوں پر بریفنگ دیتے ہوئے کہا کہ بھارت کے اشتعال انگیز اقدامات کے سنگین نتائج ہو سکتے ہیں جب کہ انٹیلی جنس اطلاعات میں بھارت کی ممکنہ عسکری کارروائی کاخدشہ ظاہر کیا گیا ہے۔

بھارت کی ریاستی دہشت گردی اور ٹارگٹ کلنگز کا بھی حوالہ دیا گیا۔ترجمان دفتر خارجہ کا مزید کہنا ہے کہ پاکستان نے پہلگام حملے سے متعلق بھارتی الزامات کو سختی سے مسترد کر دیاہے اورکہا ہے کہ بغیر تحقیق اور ثبوت کے الزامات لگانا قابل مذمت ہے۔ بھارت ایسے واقعات کا استعمال کشمیری جدوجہد کو کمزور کرنے کیلئے کرتا ہے۔ترجمان دفتر خارجہ کے مطابق سندھ طاس معاہدہ کو معطل کرنا بھارت کی خطرناک چال ہے۔

دریاوں کے بہاو کو روکنا یا موڑنا جنگ کے مترادف ہوگا اور سلامتی کونسل ارکان نے بھی سندھ طاس معاہدہ معطل کرنے پر تحفظات کااظہار کیا۔ترجمان دفتر خارجہ کامزید کہنا تھا کہ پاکستان اپنی خودمختاری کے دفاع کیلئے مکمل طور پر تیار ہے۔ جارحیت کی صورت میں پاکستان اقوام متحدہ چارٹرکے تحت دفاع کا حق رکھتا ہے۔ترجمان دفتر خارجہ نے بتایا کہ کئی ارکان نے مسئلہ کشمیر کوعلاقائی عدم استحکام کی بنیادی وجہ قرار دیتے ہوئے کہا کہ مسئلہ کشمیرکو اقوام متحدہ کی قراردادوں اور کشمیری عوام کی خواہشات کے مطابق حل ہوناچاہیے۔