Live Updates

بھارت اشتعال انگیز بیان بازی بند کرے، او آئی سی گروپ

پاکستان کے اِس مقف کی بھی قدر کرتے ہیں کہ وہ کشیدگی نہیں چاہتا،بیان

منگل 6 مئی 2025 15:01

نیویارک (اُردو پوائنٹ اخبارتازہ ترین - این این آئی۔ 06 مئی2025ء)اسلامی تعاون تنظیم گروپ نے جنوبی ایشیا میں بگڑتی ہوئی سیکیورٹی صورتحال پر اظہار تشویش کیا ہے، بھارت کی جانب سے پاکستان پر لگائے گئے بے بنیاد الزامات کے باعث پہلے سے ہی غیر مستحکم خطے میں حالات مزید کشیدہ ہو رہے ہیں، دہشت گردی کی ہر شکل میں مذمت کرتے ہیں۔غیرملکی خبررساں ادارے کے مطابق ایک بیان میں اسلامی تعاون تنظیم گروپ نے کہا کہ جموں و کشمیر کا دیرینہ تنازعہ جنوبی ایشیا میں امن و امان کو متاثر کرنے والا بنیادی مسئلہ ہے، سلامتی کونسل کی متعلقہ قراردادوں کے مطابق جموں و کشمیر کے عوام کو ابھی تک ان کے ناقابلِ تنسیخ حقِ خودارادیت سے محروم رکھا جا رہا ہے۔

او آئی سی کا کہنا تھا کہ پاکستان کی طرف سے مسلسل تحمل کے مظاہرے اور بین الاقوامی قانون اور اقوامِ متحدہ کے چارٹر کے مطابق تنازعات کے پرامن حل کے عزم کو سراہتے ہیں، پاکستان کے اِس مقف کی بھی قدر کرتے ہیں کہ وہ کشیدگی نہیں چاہتا، بلکہ باہمی احترام اور کشمیری عوام کی جائز امنگوں پر مبنی سفارتی روابط کے لیے تیار ہے۔

(جاری ہے)

اقوام متحدہ کے سیکرٹری جنرل کی طرف سے ثالثی کی پیشکش کو سراہتے ہیں، بین الاقوامی برادری بشمول اقوام متحدہ کی سلامتی کونسل اور بااثر ریاستوں سے مطالبہ ہے کہ وہ پاک بھارت کشیدگی کے خاتمے کے لیے فوری اور مثر اقدامات کریں۔

بیان میں مزید کہنا تھا کہ بھارت پر زور دیتے ہیں کہ وہ اپنی اشتعال انگیز بیان بازی اور ایسے جارحانہ اقدامات بند کرے جو علاقائی اور بین الاقوامی امن و سلامتی کو خطرے میں ڈال رہے ہیں۔