پی ایس ایل: اسلام آباد یونائیٹڈ اور کوئٹہ گلیڈی ایٹرز کی ٹیمیں کل پنجہ آزمائی کریں گی

منگل 6 مئی 2025 23:02

اسلام آباد(اُردو پوائنٹ اخبارتازہ ترین - آن لائن۔ 06 مئی2025ء) پاکستان سپر لیگ 10 میں (کل)7مئی (بدھ کو) واحد میچ اسلام آباد یونائیٹڈ اور کوئٹہ گلیڈی ایٹرز کے مابین کھیلا جائے گا۔ پاکستان کرکٹ بورڈ(پی سی بی )کے زیر اہتمام پی ایس ایل کے دسویں ایڈیشن کے دلچسپ مقابلوں کا سلسلہ جاری ہے،جس میں شائقین کرکٹ کو انتہائی دلچسپ اور کانٹے دار مقابلے دیکھنے کو مل رہے ہیں۔

لیگ کے 26 ویں میچ میں بدھ کو اسلام آباد یونائیٹڈ اور کوئٹہ گلیڈی ایٹرز کی ٹیمیں قذافی کرکٹ سٹیڈیم،لاہور میں مدمقابل ہوں گی۔ میچ رات 8 بجے شروع ہو گا اور فلڈ لائٹس کی روشنی میں کھیلا جائے گا۔ اسلام آباد یونائیٹڈ کو مایہ ناز آل رائونڈر شاداب خان لیڈ کر رہے ہیں اور دیگر نمایاں کھلاڑیوں میں میتھیوشارٹ،کولن منرو،راسی وین ڈیر ڈوسن،جیسن ہولڈر،حیدرعلی،سلمان آغا،عمادوسیم،حنین شاہ اور اعظم خان شامل ہیں۔

(جاری ہے)

اسلام آباد یونائیٹڈ کی ٹیم لیگ میں 8 میچز میں سے 5 میں کامیابی حاصل کی ہے اور وہ 10 پوائنٹس کے ساتھ پوائنٹس ٹیبل پر دوسری پوزیشن پر موجود ہے ۔کوئٹہ گلیڈی ایٹرز کی ٹیم مایہ ناز آل رائونڈر سعود شکیل کی زیر قیادت میدان میں اترے گی، دیگر نمایاں کھلاڑیوں میں مارک، چیپمین ،ریلی روسو،فن ایلن، حسن نواز،فہیم اشرف،شعیب ملک،حسیب اللہ خان،کوسل مینڈس،ابراراحمد،محمد عامر،سین ایبٹ اور کائل جیمیسن شامل ہیں۔ کوئٹہ گلیڈی ایٹرز کی ٹیم بھی 8 میچز کھیل چکی ہے جن میں اس کو 5 میچز میں فتح نصیب ہوئی جبکہ 3 میں شکست ہوئی ہے۔کوئٹہ گلیڈی ایٹرز کی ٹیم ٹیبل پر 11 پوائنٹس کے ساتھ ٹاپ پوزیشن پر پہنچ چکی ہے ۔ ٹورنامنٹ کا فائنل 18 مئی کو قذافی سٹیڈیم، لاہور میں کھیلا جائے گا۔