Live Updates

بھارتی حملوں پر پاکستان کا منہ توڑ جواب، بھارت کا فلائٹ آپریشن بری طرح متاثر، کئی ائیرپورٹس بند

بدھ 7 مئی 2025 15:06

نئی دہلی (اُردو پوائنٹ اخبارتازہ ترین - این این آئی۔ 07 مئی2025ء)بھارت کے بزدلانہ حملے پر پاکستان نے بھرپور اور منہ توڑ جواب دیا جس کے بعد بھارت کا فلائٹ آپریشن بری طرح متاثر ہے اور کئی بڑے ائیر پورٹس بند کر دیے گئے ہیں۔بھارتی فوج نے رات کی تاریکی میں بزدلانہ حملہ کرتے ہوئے آزاد کشمیر کے علاقوں کوٹلی، مظفر آباد اور باغ کے علاوہ مریدکے اور احمد پور شرقیہ میں شہری آبادی کو نشانہ بنایا۔

پاک فوج نے بھارتی بزدلانہ کارروائیوں کا بھرپور جواب دیتے ہوئے بھارتی فوج کے 3 رافیل، ایک سکوئی، ایک مگ 29 اور ایک ڈرون تباہ کر دیا جبکہ بھارتی فوج کا بریگیڈ ہیڈ کوارٹر بھی تباہ کر دیا۔بھارت نے لائن آف کنٹرول پر سفید جھنڈا لہرا کر شکست تسلیم کر لی۔رات کے اندھیرے میں کیے گئے بھارت کے حملے کے بعد پاکستان کے ائیرپورٹس پر فضائی آپریشن معطل کر دیا گیا ہے جبکہ کشیدہ صورت حال کے باعث بھارت نے بھی اپنے ہوائی اڈوں سے فلائٹ آپریشن بند کر دیا۔

(جاری ہے)

بھارت کے متاثرہ ہوائی اڈوں میں ریاست ہماچل پردیش کا دھرم شالہ ائیرپورٹ، لیہہ، جموں اور سری نگر ائیر پورٹس، پنجاب میں امرتسر اور چندی گڑھ ائیرپورٹس پر فلائٹ آپریشن بند کر دیا گیا ہے۔اس کے علاوہ راجکوٹ، بھج، جام نگر اور بیکانیر میں پروازیں متاثر ہوئیں، بھارتی ائیر لائنز نے اپنی پروازیں منسوخ کرنے کے حوالے سے عوام کو سوشل میڈیا کے ذریعے آگاہ کیا۔