بھارتی فاشسٹ حکومت کا اصل چہرہ بے نقاب، علاقائی امن خطرے میں ڈال دیا.صدر مملکت

پاکستان بھارتی اشتعال انگیزی کا بھرپور اور منہ توڑ جواب دے گا اور اپنے دفاع کے لیے ہر ممکن اقدام اٹھائے گا. آصف زرداری کا بیان

میاں محمد ندیم بدھ 7 مئی 2025 15:10

بھارتی فاشسٹ حکومت کا اصل چہرہ بے نقاب، علاقائی امن خطرے میں ڈال دیا.صدر ..

اسلام آباد(اردوپوائنٹ اخبارتازہ ترین-انٹرنیشنل پریس ایجنسی۔ 07 مئی ۔2025 )صدر مملکت آصف علی زرداری نے کہا کہ بزدلانہ حملے سے بھارتی فاشسٹ حکومت کا اصل چہرہ بے نقاب ہوگیا جس نے علاقائی امن کو خطرے میں ڈال دیا ہے ایوان صدر سے جاری بیان کے مطابق صدر مملکت آصف علی زرداری نے بھارت کی جانب سے پاکستان کے خلاف جارحیت کی شدید مذمت کی ہے اور کہا ہے کہ پاکستان بھارتی اشتعال انگیزی کا بھرپور اور منہ توڑ جواب دے گا.

(جاری ہے)

آصف علی زرداری نے کہا کہ بھارت نے بلا اشتعال شہری آبادی کو نشانہ بنا کر ناصرف بین الاقوامی قوانین کی خلاف ورزی کی ہے بلکہ اقوام متحدہ کے چارٹر اور پاکستان کی خودمختاری کی کھلی توہین کی ہے، پاکستان بھارتی جارحیت کا بھرپور جواب دے گا اور اپنے دفاع کے لیے ہر ممکن اقدام اٹھائے گا. انہوں نے کہا کہ پاکستان کی مسلح افواج اپنے مادر وطن کے ایک ایک انچ کے دفاع کے لئے پوری طرح تیار اور اہل ہیں ان کا کہنا تھا کہ بھارت کے بزدلانہ اقدامات سے ایک فاشسٹ حکومت کا اصل چہرہ بے نقاب کرتے ہیں جو اپنے سیاسی ایجنڈے کو آگے بڑھانے کے لئے علاقائی امن و سلامتی کو دا پر لگانے کے لئے تیار ہے.

صدر مملکت نے کہا کہ پاکستان کی خودمختاری اور علاقائی سالمیت کے تحفظ کے لئے ہمارا عزم غیر متزلزل ہے اور ہم کسی بھی جارحیت کا بھرپور جواب دیں گے پوری پاکستانی قوم اپنی بہادر مسلح افواج کے پیچھے متحد ہے اور ملک کی سلامتی کے لئے کسی بھی قربانی سے دریغ نہیں کرے گی آصف علی زرداری نے عالمی برادری سے اپیل کی کہ وہ بھارت کی جارحیت کی مذمت کرے اور پاکستان کے خودمختاری کے حق میں آواز اٹھائے.