آپ کی افواج نے منہ توڑ جواب دیا، ہندوستان عقلمندی کے تمام راستے کھونے کے قریب ہے، ترجمان پاک فوج

بھارت پوری دنیا کا امن خطرے میں ڈال رہا ہے، ہم اس قسم کی جارحیت کو ناصرف قابو پانے کا عزم رکھتے ہیں بلکہ اس پر قابو پانے کی بھرپور صلاحیت بھی رکھتے ہیں؛ ڈی جی آئی ایس پی آر کی پریس کانفرنس

ساجد علی جمعرات 8 مئی 2025 12:38

آپ کی افواج نے منہ توڑ جواب دیا، ہندوستان عقلمندی کے تمام راستے کھونے ..

راولپنڈی ( اُردو پوائنٹ اخبارتازہ ترین۔ 08 مئی 2025ء ) پاک فوج کے شعبہ تعلقات عامہ ( آئی ایس پی آر) کے ڈائریکٹر جنرل لیفٹیننٹ جنرل احمد شریف چوہدری کا کہنا ہے بھارت کی طرف سے ڈرونز بھیجے جانے کا سلسلہ ہے، رات کو بھی جارحیت ہوئی جس کا آپ کی افواج نے منہ توڑ جواب دیا، گزشتہ رات بھارت کی جانب سے پاکستان کے مختلف علاقوں میں حملے کیے گئے جنہیں پاک فوج نے بروقت کارروائیاں کرتے ہوئے ناکام بنایا۔

تفصیلات کے مطابق پریس بریفنگ کے دوران انہوں نے بتایا کہ بھارت نے گزشتہ رات ایک بار پھر کھلی جارحیت کرتے ہوئے پاکستانی فضائی حدود کی خلاف ورزی کی ہے، بھارت کی جانب سے لاہور، چکوال، راولپنڈی، اٹک، بہاولپور، چھور، میانو سندھ، گوجرانوالہ اور کراچی کے قریب 12 مقامات پر ہیروپ ڈرونز بھیجے گئے جنہیں پاک فوج کے چوکنا اہلکاروں نے بروقت کارروائیاں کرتے ہوئے تباہ کردیا، تباہ ہونے والے بھارتی ڈرونز کا ملبہ متعلقہ علاقوں میں موجود ہے، لاہور میں پاک فوج کے 4 افسران زخمی ہوئے، سندھ کے علاقے میانو میں ایک سویلین شہری شہید ہوا، ان ڈرون حملوں میں 2 شہری زخمی بھی ہوئے۔

(جاری ہے)

ڈی جی آئی ایس پی آر کہتے ہیں کہ 6 اور 7 مئی کو بھارت نے پاکستان پر حملے کی غلطی کی جس کا اسے بھاری نقصان اٹھانا پڑا، ہندوستان عقلمندی کے تمام راستے کھونے کے قریب ہے، بھارت کو رات گئے کیے گئے حملوں کا منہ توڑ جواب دیا گیا، گزشتہ رات کی جارحیت انتہائی سنگین اشتعال انگیزی ہے، اس وقت بھی یہ عمل جاری ہے اور پاک فوج انہیں گرانے میں مصروف ہے، یہ سنگین صورتحال ہے، دنیا دیکھ رہی ہے کہ بھارت نا صرف اس خطے بلکہ پوری دنیا کے امن کو خطرے میں ڈال رہا ہے، ہم اس قسم کی جارحیت کو ناصرف قابو پانے کا عزم رکھتے ہیں بلکہ اس پر قابو پانے کی بھرپور صلاحیت بھی رکھتے ہیں۔