بھارتی جارحیت کے خلاف کے ایم یو کے تمام کیمپسز میں بھرپور احتجاج

جمعرات 8 مئی 2025 23:10

پشاور (اُردو پوائنٹ اخبارتازہ ترین - اے پی پی۔ 08 مئی2025ء) خیبر میڈیکل یونیورسٹی (کے ایم یو) پشاور کے مرکزی کیمپس سمیت تمام علاقائی کیمپسز میں بھارتی جارحیت کے خلاف بھرپور احتجاجی مظاہرے کیے گئے۔ ان مظاہروں میں طلباء، طالبات، فیکلٹی ممبران اور انتظامی عملے کی بڑی تعداد نے شرکت کی اور پاک فوج کے حق میں اور بھارت کے خلاف شدید نعرہ بازی کرتے ہوئے بھارت کے طرف سے پاکستان کے خلاف ریاستی دہشت گردی کی سخت ترین الفاظ میں مذمت کی۔

احتجاجی مظاہروں کی قیادت کے ایم یو کے وائس چانسلر پروفیسر ڈاکٹر ضیاء الحق اور رجسٹرار انعام اللہ خان وزیر نے کی۔ مظاہرین نے بینرز اور پلے کارڈز اٹھا رکھے تھے جن پر بھارتی بربریت، انسانی حقوق کی پامالی اور عالمی برادری کی خاموشی کے خلاف نعرے درج تھے۔

(جاری ہے)

اس موقع پر خطاب کرتے ہوئے وائس چانسلر پروفیسر ڈاکٹر ضیاء الحق نے کہا کہ بھارت کی جانب سے رات کی تاریکی میں نہتے شہریوں، بچوں اور مساجد پر حملہ کرکے انسانی اقدار کو پامال کیا گیاجو کہ انتہائی قابل مذمت ہے۔

انہوں نے کہا کہ پوری پاکستانی قوم، خصوصاً نوجوان نسل اپنی افواج کے ساتھ کھڑی ہے اور کسی بھی جارحیت کا منہ توڑ جواب دینے کے لیے تیار ہے۔ انہوں نے مزید کہا کہ پاکستان ایک پُرامن ملک ہے لیکن دشمن کی کسی بھی مہم جوئی یا بزدلانہ کارروائی کا منہ توڑ جواب دینا ہماری قومی ذمہ داری ہے۔ انہوں نے کہا کہ قوم آج سیسہ پلائی دیوار کی طرح متحد ہے اور دشمن کے ناپاک عزائم کو خاک میں ملا نے کے عزم سے سرشار ہے۔

دیگرمقررین نے بھارتی حملوں کو ریاستی دہشت گردی قرار دیتے ہوئے کہا کہ بین الاقوامی برادری کو چاہیے کہ وہ بھارت کی اس اشتعال انگیزی کا نوٹس لے اور انسانی حقوق کی خلاف ورزیوں پر بھارت کا احتساب کرے۔ احتجاجی مظاہروں کے اختتام پر طلباء، اساتذہ اور ملازمین نے یکجہتی کا اظہار کرتے ہوئے قومی ترانہ پڑھا اور افواجِ پاکستان کے حق میں نعرے لگائے۔ تمام کیمپسز میں یہ احتجاج مکمل نظم و ضبط اور حب الوطنی کے جذبے کے ساتھ منعقد کیا گیا جس کا مقصد بھارت اور دنیاکو یہ پیغام دینا تھا کہ پاکستانی قوم ہر جارحیت کا متحد ہو کر مقابلہ کرنے کے لیے تیار ہے۔