وزیراعظم شہباز شریف کی صدرآصف زرداری سے ملاقات

دونوں رہنماوٴں نے قومی سلامتی، خطے کی صورتحال اور آئندہ کے لائحہ عمل پر مشاورت

فیصل علوی ہفتہ 10 مئی 2025 15:30

وزیراعظم شہباز شریف کی صدرآصف زرداری سے ملاقات

اسلام آباد(اردوپوائنٹ اخبار تازہ ترین۔10 مئی 2025)وزیراعظم شہباز شریف نے صدر مملکت آصف علی زرداری سے ملاقات کی،نائب وزیراعظم و وزیر خارجہ سینیٹر اسحاق ڈار اور وزیر قانون و انصاف سینیٹر اعظم نذیر تارڑ بھی موجود تھے،وزیراعظم نے صدر آصف زرداری کو آپریشن بنیان مرصوص کی صورت میں بھارت کو دیئے جانے والے جواب بارے آگاہ کیا۔دونوں رہنماﺅں کے درمیان پاک بھارت کشیدگی ودیگر امور سمیت خطے کی بدلتی ہوئی صورتحال پربھی تبادلہ خیال کیا گیا۔

ایوان صدر کی جانب سے جار ی بیان کے مطابق وزیراعظم شہباز شریف نے صدر مملکت آصف زرداری کو بھارت کی جانب سے جاری جارحیت اور پاکستان کے جوابی آپریشن کی تفصیلات سے آگاہ کیا۔ ملاقات کے دوران دونوں رہنما¿ں نے قومی سلامتی، خطے کی صورتحال اور آئندہ کے لائحہ عمل پر مشاورت کی۔

(جاری ہے)

صدر مملکت نے بھارتی جارحیت، میزائل حملوں کا منہ توڑ جواب دینے پر مسلح افواج کی غیر معمولی پیشہ ورانہ مہارت اور بہادری کو سراہا۔

وزیراعظم نے صدرآصف زرداری کو بتایا کہ پاکستان نے بھارت کی جانب سے کی گئی اشتعال انگیزیوں کا بھرپور اور موثر جواب دیا ہے اور قومی سلامتی کے تحفظ کیلئے تمام ممکنہ اقدامات کئے جا رہے ہیں۔اس موقع پر گفتگو کرتے ہوئے صدر آصف علی زرداری کا کہنا تھا کہ افسوس کہ بھارتی جارحیت کی وجہ سے پاکستان کے پاس اپنی خودمختاری کے دفاع ، اپنے شہریوں کے تحفظ کیلئے فیصلہ کن جواب دینے کے سوا کوئی چارہ نہیں بچا۔

انہوں نے کہا کہ پاکستان نے ایک ذمے دار اور امن پسند قوم کی حیثیت سے بھارتی اشتعال انگیزیوں کے مقابلے میں کافی تحمل کا مظاہرہ کیا ۔ان کا یہ بھی کہنا تھا کہ پوری پاکستانی قوم متحد ہے اور بھارتی جارحیت کے مقابلے میں اپنی مسلح افواج کی بھرپور حمایت کرتی ہے۔ پاکستان ملکی خودمختاری اور علاقائی سالمیت کا ہر قیمت پر دفاع کرے گا۔