Live Updates

باسط علی نے پی ایس ایل 10 کے بقیہ میچز بنگلادیش میں کرانے کی تجویز دے دی

پی سی بی نے یہ قدم اٹھایا تو عوام کی جانب سے زبردست پذیرائی ملے گی، سابق ٹیسٹ کرکٹر

ذیشان مہتاب پیر 12 مئی 2025 11:55

باسط علی نے پی ایس ایل 10 کے بقیہ میچز بنگلادیش میں کرانے کی تجویز دے ..

کراچی (اردو پوائنٹ تازہ ترین اخبار ۔ 12 مئی 2025ء ) قومی ٹیم کے سابق ٹیسٹ کرکٹر باسط علی نے پاکستان سپر لیگ (پی ایس ایل) سیزن 10 کے باقی ماندہ میچز بنگلادیش منتقل کرنے کی تجویز پیش کی ہے۔

سماجی رابطے کی ویب سائٹ ایکس پر اپنے بیان میں 54 سالہ باسط علی نے کہا کہ پی ایس ایل کے میچز دبئی کے بجائے بنگلادیش میں کروانے چاہئیں، کیونکہ بنگلادیش ہمارا برادر ملک ہے اور وہاں شائقین بڑی تعداد میں اسٹیڈیم آتے ہیں۔

(جاری ہے)

انہوں نے کہا کہ اگر پاکستان کرکٹ بورڈ نے یہ قدم اٹھایا تو عوام کی جانب سے زبردست پذیرائی ملے گی۔

یاد رہے کہ بھارتی جارحیت کے پیش نظر پی سی بی نے پی ایس ایل 2025ء کو غیرمعینہ مدت کے لیے معطل کر دیا تھا تاہم حالیہ دنوں پی ایس ایل انتظامیہ نے فرنچائزز کو ہدایت دی ہے کہ غیر ملکی کھلاڑیوں کو دبئی میں روک کر رکھا جائے جب کہ مقامی کھلاڑیوں کو بھی ذہنی طور پر تیار رہنے کی ہدایت دی گئی ہے۔

ذرائع کے مطابق امکان ہے کہ کھلاڑیوں کو اسلام آباد میں جمع ہونے کے لیے کہا جا سکتا ہے تاکہ ٹورنامنٹ سے متعلق حتمی فیصلہ کیا جا سکے۔