Live Updates

بھارت کا آپریشن بنیان مرصوص کے دوران پاکستان کے بڑے سائبر حملے کا اعتراف

پاکستان کا بھارت پر سائبر حملہ تاریخ کا سب سے بڑا سائبر اٹیک قرار، اہم بھارتی تنصیبات کو نشانہ بنانے کیلئے 15 لاکھ سے زائد سائبر حملے کیے گئے جن کے پیچھے 7 جدید ہیکنگ گروپس کا ہاتھ تھا؛ بھارتی میڈیا رپورٹس

ساجد علی منگل 13 مئی 2025 13:06

بھارت کا آپریشن بنیان مرصوص کے دوران پاکستان کے بڑے سائبر حملے کا اعتراف

نئی دہلی ( اُردو پوائنٹ اخبارتازہ ترین۔ 13 مئی 2025ء ) بھارت نے آپریشن بنیان مرصوص کے دوران پاکستان کے بڑے سائبر حملے کا اعتراف کرلیا۔ میڈیا رپورٹس کے مطابق بھارت کی جانب سے آپریشن بنیان مرصوص میں پاکستان کے بڑے سائبر حملوں کا اعتراف کرتے ہوئے دعویٰ کیا گیا ہے کہ پاکستانی ہیکرز نے 15 لاکھ سائبر حملے کیے، اس دوران پاکستان نے بھارت کی بجلی تنصیبات پر زبردست سائبر حملہ کرتے ہوئے بھارت کے 70 فیصد بجلی گرڈ کو ناکارہ بنایا، اس حملے کے نتیجے میں پورے بھارت میں بجلی کا نظام درہم برہم ہوا اور ہر طرف اندھیرا چھا گیا تھا، اس کے علاوہ پاکستانی سائبر فورسز نے بھارتی ڈیجیٹل انفراسٹرکچر پر وار کرتے ہوئے ان کی متعدد سرکاری، دفاعی اور حساس ویب سائٹس کو ہیک کر کے ان کا ڈیٹا ڈیلیٹ اور لیک بھی کردیا تھا۔

(جاری ہے)

بھارتی میڈیا نے بتایا ہے کہ مہاراشٹرا سائبر سیل نے ایک رپورٹ میں انکشاف کیا کہ انڈیا کی اہم تنصیبات کو نشانہ بنانے کے لیے 15 لاکھ سے زائد سائبر حملے کیے گئے جن کے پیچھے سات جدید ہیکنگ گروپس (Advanced Persistent Threat – APT) کا ہاتھ تھا، یہ حملے سیزفائر کے بعد شروع کیے گئے، ان سائبر حملوں کا آغاز بنگلہ دیش، پاکستان، مشرق وسطیٰ اور انڈونیشیا کے ایک گروپ سے ہوا۔

مہاراشٹرا سائبر سیل کے ایک سینئر عہدیدار کا کہنا ہے کہ پاکستانی ہیکرز نے بھارت کے کئی بڑے ہوائی اڈوں اور الیکشن کمیشن آف انڈیا کی ویب سائٹ کو نشانہ بنانے کی کوشش کی، ان میں چھترپتی شیواجی مہاراج انٹرنیشنل ایئرپورٹ (ممبئی) بھی شامل تھا، بھارتی حکام نے پاکستانی سائبر اٹیک پر اب تک خاموشی اختیار کر رکھی تھی تاہم اب انہوں نے اس بات کا اعتراف کرلیا کہ پاکستان نے بڑے پیمانے پر بھارت کی سائبر حملہ کیا اور پاکستان کا بھارت پر سائبر حملہ تاریخ کا سب سے بڑا سائبر اٹیک قرار دیا گیا۔