پنجاب بھر کے سکولوں میں پاک فوج سے اظہار یکجہتی اور یوم تشکر منایا گیا

منگل 13 مئی 2025 17:46

لاہور (اُردو پوائنٹ اخبارتازہ ترین - اے پی پی۔ 13 مئی2025ء) وزیراعلیٰ پنجاب مریم نواز شریف کی ہدایت پر پنجاب بھر کے سکولوں میں پاک فوج سے اظہار یکجہتی اور یوم تشکر منایا گیا۔پنجاب کے تعلیمی ادارو ں میں آپریشن بنیان مرصوص کی کامیابی پر جشن کا سماں تھا۔طلبہ نے پاک فوج کے سربراہ کی تصاویر بھی اٹھا رکھی تھیں اور ننھے بچوں نے یونیفارم پہن کر مارچ کیا۔

ننھی طالبات نے پاک فضائیہ کے جانبازوں کو خراج تحسین پیش کیا اور افواج پاکستان کی جرات اور شجاعت کو سلام پیش کیا۔قصور کے طلبہ کی ریلی کی قیادت کرنے کیلئے صوبائی وزیر تعلیم رانا سکندر حیات خود پہنچے جہاں طلبہ نے پاکستان زندہ باد اور پاک فوج زندہ باد کے نعرے لگائے جبکہ مصنوعی بارڈر پر مصنوعی جنگ کے رو ح پرور مناظر،موک فائرنگ،دشمن کو بری طرح پچھاڑ دیا۔

(جاری ہے)

طلبہ نے دشمن سے مصنوعی جنگ جیتنے پر پیس پریڈ کرکے فتح کا جشن منایا۔ننھے طلبہ نے سرحدی گاوں کے کچے گھروں کے ماڈل بھی بنائے۔طلبہ نے پاک فوج کی کامیابیوں کا تالیاں بجا کر خیرمقدم کیا۔ننھی بچیوں نے قومی پرچم لہرائے اور پاکستان زندہ باد کے نعرے لگائے اور طالبات نے پاک فوج کے حق میں بینرز اٹھا کر جلوس نکالے۔پتوکی کے گرلز سکول کی طالبات نے مارچ کیا اور نعرے لگا کر پاک فوج کو خراج تحسین پیش کیا۔

طلبہ نے پینٹنگ اور پوسٹر بنا کر پاک دھرتی سے محبت کا اظہار کیا۔سکولوں میں جنگ کے علامتی سائرن بجائے گئے،بچوں نے قومی ترانے اور نغمے پیش کئے جبکہ ننھے بچوں نے امن اور اپنے ہیروز کی سلامتی کیلئے خصوصی دعائیں کیں۔آپریشن بنیان مرصوص کے حوالے سے پوسٹر اور ڈرائنگ کے مقابلے بھی ہوئے ۔ ننھے بچوں نے پر اثر نغمے اور نظمیں بھی پیش کیں۔ننھے طلبہ نے پاک فوج کے سربراہ اور سپاہیوں کو محبت بھرے خط لکھے۔سکول اسمبلی کے دوران بچوں نے پاک فوج زندہ باد کے نعرے لگائے اور گرمجوشی سے وطن عزیز سے محبت کا اظہار کیا۔