بھارتی حملے میں زخمی ہونے والے افواج پاکستان کے مزید 2 جوان شہید ہوگئے، بھارتی حملوں میں شہید جوانوں کی تعداد تیرہ ہوگئی

بدھ 14 مئی 2025 17:05

راولپنڈی(اُردو پوائنٹ اخبارتازہ ترین - این این آئی۔ 14 مئی2025ء)حالیہ بھارتی جارحیت کے دوران زخمی ہونے والے افواج پاکستان کے مزید 2 سپوت شہید شہید ہوگئے، بھارتی حملوں میں شہید جوانوں کی مجموعی تعداد 13 ہوگئی جبکہ 78 اہلکار زخمی ہوئے۔پاک فوج کے شعبہ تعلقات عامہ (آئی ایس پی آر )کے مطابق 6 اور 7 مئی کو شروع کی گئی بھارتی مسلح افواج کی کھلی اور بزدلانہ جارحیت نے معصوم شہریوں کو نشانہ بنایاجن میں واتین، بچے، اور بزرگ بھی شامل تھے۔

آئی ایس پی آر کے مطابق وطنِ عزیز کا دفاع کرتے ہوئے بے مثال جرات اور غیر متزلزل عزم کا مظاہرہ کرنے والے 2 مزید بہادر سپوت آج جامِ شہادت نوش کر گئے، جو زخمی ہونے کے بعد ہسپتال میں زیر علاج تھے، اس طرح شہدائے پاک فوج کی تعداد 13 ہو گئی ہے جبکہ 78 جوان زخمی ہوچکے ہیں۔

(جاری ہے)

آئی ایس پی آر کے مطابق شہدا میں پاک فوج کے حوالدار محمد نوید اور پاک فضائیہ کیسینئر ٹیکنیشن محمد ایاز شامل ہیں۔

آئی ایس پی آر کے مطابق شہدا کی عظیم قربانی ان کے حوصلے، فرض سے وفاداری، اور غیر متزلزل حب الوطنی کی ہمیشہ رہنے والی علامت ہے۔آئی ایس پی آر نے کہا کہ پاکستان کی مسلح افواج قوم کے ساتھ مل کر ان عظیم شہدا کو اعلیٰ ترین خراجِ عقیدت پیش کرتی ہیں اور غمزدہ خاندانوں سے دلی تعزیت کا اظہار کرتی ہیں، اس کے ساتھ ساتھ تمام زخمیوں کی جلد اور مکمل صحتیابی کے لیے دعاگو ہیں’۔آئی ایس پی آر کے مطابق یہ قربانیاں قوم کی اجتماعی یادداشت میں ہمیشہ زندہ رہیں گی اور آنے والی نسلوں کے لیے جرات اور قربانی کی روشن مثال بنی رہیں گی۔