وفاقی وزیر ریلوے حنیف عباسی کی زیرصدارت اجلاس، پاکستان ریلوے کے لئے انقلابی اقدامات کا اعلان

بدھ 14 مئی 2025 19:35

اسلام آباد (اُردو پوائنٹ اخبارتازہ ترین - اے پی پی۔ 14 مئی2025ء) وفاقی وزیر ریلوے حنیف عباسی نے وزیر اعظم پاکستان کی خصوصی ہدایت پر ایک اہم اجلاس کا انعقاد کیا جس میں پاکستان ریلوے کے لئے انقلابی اقدامات کا اعلان کیا گیا۔وفاقی وزیر ریلوے حنیف عباسی نے اجلاس سے خطاب کرتے ہوئے کہا کہ پاکستان ریلوے کو پاکستان کا فخر بنانے کے لیے ہم ہرممکن قدم اٹھائیں گے، ہمارا مقصد نہ صرف ریلوے کی کارکردگی کو بہتر بنانا ہے بلکہ اس کے سسٹمز میں موجود تمام مسائل اور بدعنوانیوں کا خاتمہ بھی کرنا ہے۔

وفاقی وزیر ریلوے نے اپنے ملازمین کے تحفظ کی اہمیت پر زور دیتے ہوئے کہا کہ ہم اپنے ملازمین کو مکمل تحفظ فراہم کریں گے اور ان کے حقوق کا بھرپور دفاع کریں گے، ہمارے ملازمین ہی پاکستان کی ترقی کا انجن ہیں، ان کی ترقی ہی پاکستان کی ترقی کو یقینی بنائے گی۔

(جاری ہے)

وفاقی وزیر نے کہا کہ اکائونٹیبلٹی کے عمل کو مزید موثر بنانے کے لیے ویجیلنس ڈیپارٹمنٹ کو مزید بااختیار بنانے کا فیصلہ بھی کیا ہے، ہم اس بات کو یقینی بنائیں گے کہ ہر محکمے میں شفافیت اور جوابدہی ہو اور جو بھی بدعنوانی کی کوشش کرے گا اس کا محاسبہ کیا جائے گا۔

حنیف عباسی نے کہا کہ ریلویز میں وہی رہے گا جو کام کرے گا، ہم نااہلی اور سستی کو برداشت نہیں کریں گے اور کسی بھی قسم کی اقرباء پروری کی ہرگز اجازت نہیں دی جائے گی۔ حنیف عباسی نے مزید ہر ڈویژنل سپرنٹنڈنٹ کو ہدایت دیتے ہوئے کہا کہ ٹرینوں کی بروقت آمدورفت پر کوئی سمجھوتہ نہیں ہوگا، کیونکہ یہ ہمارے نظام کی اہمیت اور عوامی اعتماد کا معاملہ ہے۔

وزیر ریلوے نے یقین دہانی کرائی کہ چند مہینوں میں ہر ڈیپارٹمنٹ میں موجود بدعنوانیوں اور ناکامیوں کا مکمل خاتمہ کیا جائے گا، ہم ہر سطح پر اقدامات اٹھائیں گے تاکہ پاکستان ریلوے کو ایک نئے دور میں داخل کر سکیں۔ وفاقی وزیر نے کہا کہ ریلوے کی ہر پروکیورمنٹ کی تھرڈ پارٹی ایوالویشن کرائی جائے گی تاکہ شفافیت اور معیار کو یقینی بنایا جا سکے۔انہوں نے کہا کہ صفائی اور صاف ستھرا کھانا ہر مسافر کا حق ہے اور اس میں کسی قسم کی لاپرواہی ناقابل برداشت ہوگی۔