مانچسٹر کی سابق لارڈ میئر کونسلر یاسمین ڈار چیئرپرسن انٹرنیشنل لابی آن کشمیر کی برطانیہ میں تعینات پاکستانی ہائی کمشنر ڈاکٹر محمد فیصل کے ساتھ مسلہ کشمیر پر تفصیلی بات چیت

لندن(اُردو پوائنٹ اخبارتازہ ترین - این این آئی۔ 15 مئی2025ء)مانچسٹر کی سابق لارڈ میئر کونسلر یاسمین ڈار چیئرپرسن انٹرنیشنل لابی آن کشمیر کی برطانیہ میں تعینات پاکستانی ہائی کمشنر ڈاکٹر محمد فیصل کے ساتھ مسلہ کشمیر پر تفصیلی ملاقات۔ بعد ازاں انہوں نے پندرہ سے زائد برطانوی ممبران پارلیمنٹ کے ساتھ ملاقاتیں کر کے انہیں پاک بھارت جنگ اور کشمیریوں پر جاری بھارتی مظالم کے بارے میں بریفنگ دی۔

آل پارٹیز پارلیمنٹری کشمیر گروپ کے چیئرمین بیرسٹر عمران حسین ایم پی کی کال پر برطانوی وزارت خارجہ کے نائب وزراء، دونوں ایوانوں کے تیرہ ممبران برطانوی پارلیمنٹ اور ایمنسٹی انٹرنیشنل کے نمائندوں نے اس خصوصی میٹنگ میں شرکت کر کے بریفنگ دی اور ممبران برطانوی پارلیمنٹ کے خیالات سے آگاہی حاصل کی۔

(جاری ہے)

اس انتہائی اہمیت کی حامل میٹنگ میں جن شخصیات نے شرکت کی ان میں بیرسٹر عمران حسین، ممبر برطانوی پارلیمنٹ، برٹش فارن منسٹر برائے ساوتھ ایشیاء مسٹر ہمیش فالکونر ایم پی، مس کیتھرین ویسٹ ایم پی، لارڈ واجد خان منسٹر آف فیتھ ایند کمیونٹیز، ڈیبی ابراہمز ایم پی، لارڈ قربان حسین، بیرسٹر یاسمین قریشی ایم پی، محمد یاسین ایم پی، طاہر علی ایم پی، ریبیکا لانگ بیلی ایم پی، رچرڈ برگن ایم پی، ابتسام محمد ایم پی، ایان لیوری ایم پی، تان دیسی ایم پی، ریچل ہوپکنز ایم پی، اولیور ریان ایم پی اور محمد اقبال ایم پی شامل ہیں۔

ان خیالات کا اظہار کونسلر یاسمین ڈار نے میڈیا سے خصوصی گفتگو کرتے ھوئے کیا اور کہا کہ وہ قائد تحریک راجہ نجابت حسین کی سرپرستی میں انٹرنیشنل لابی آن کشمیر کی سرگرمیاں جاری رکھے ہوئے ہیں اور اسی سلسلہ میں انہوں نے پاکستانی ہائی کمشنر ڈاکٹر محمد فیصل سے ملاقات کر کے انہیں تحریک کے آمدہ پروگراموں، کشمیر کمیٹی کے دورہ برطانیہ اور اسی طرح آزاد جموں وکشمیر اور پاکستان سے برطانیہ تشریف لانے والے وفود کے علاوہ لیبر پارٹی کے وزراء، ممبران برطانوی پارلیمنٹ اور دیگر سیاسی و سماجی تنظیموں کے ساتھ تحریکی رابطوں کے حوالہ سے آگاہ کرتے ھوئے کہا کہ جموں کشمیر تحریک حق خود ارادیت انٹرنیشنل کے عہدیداران برطانیہ بھر میں تقریبات منعقد کر رھے ہیں، پاکستان اور پاکستانی مسلح افواج کے حق میں قراردادیں پاس کروا رھے ہیں، مختلف ٹاون ہالز میں منتخب ہونے والے نئے لارڈ میئرز، میئرز اور نومنتخب کونسلروں کو جہاں وہ مبارکبادیں پیش کر رھے ہیں وہیں وہ انہیں مسلہ کشمیر پر کام کرنے کے لئے متوجہ کر رھے ہیں۔

اس سلسلے میں مانچسٹر، بریڈفورڈ، شیفیلڈ، سٹوک آن ٹرینٹ، برمنگھم، پیٹربرا اور لندن میں مختلف تقریبات منعقد کر کے کشمیری و پاکستانی کمیونٹی کو متحرک کیا جائے گا تا کہ بھارت کی طرف سے مستقبل میں موصول ہونے والی دھمکیوں اور ممکنہ جنگ کے خطرات سے بچنے کے لئے زیادہ سے زیادہ ممبران پارلیمنٹ کو اپنا ہمنوا بنانے میں کامیاب ہو سکیں۔ کونسلر یاسمین ڈار نے کہا کہ انہوں نے جہاں تحریکی عہدیداروں کے حوالہ سے ڈاکٹر فیصل کو آگاہ کیا اور ممبران پارلیمنٹ کے ساتھ ملاقاتیں کر کے انہیں مسلہ کشمیر پر بریف کیا وہیں پاکستان اور بھارت کے درمیان حالیہ ٹینشن کے بعد جس طرح مسلہ کشمیر ایک فلیش پوائنٹ بن کر ابھرا ھے اور یہی ایک مسلہ ھے جس کی وجہ سے پاکستان بھارت کے درمیان کئی دہائیوں سے کشیدگی چلی آ رھی ھے جو کسی وقت بھی شدت اختیار کر لیتی ھے۔

ہم اس بات کی توقع کرتے ہیں کہ عالمی برادری خصوصا برطانوی حکومت اپنے دیرینہ تعلقات کی بناء پر پاکستان اور بھارت کو سہ فریقی مزاکرات کے زریعے مسلہ کشمیر کو حل کروانے میں اپنا کلیدی کردار ادا کر سکتی ھے۔ یاسمین ڈار نے کہا کہ راجہ نجابت حسین اور ان کی پوری ٹیم پاکستان کے استحکام، پاکستان کی سلامتی اور آزاد خطے میں عوام کی فلاح و بہبود کے علاوہ مقبوضہ کشمیر کے عوام کے انسانی حقوق کے حصول کے لئے پرعزم ھے اور ہم اپنے مظلوم و محکوم کشمیری عوام کی جدوجہد میں اپنا سفارتی کردار ادا کرتے رہیں گے اور برطانیہ کی تمام سیاسی جماعتوں میں بلا امتیاز سیاسی وابستگی مسلہ کشمیر اسی طرح پیش کرتے رہیں گے جس طرح ماضی میں کرتے رھے ہیں اور ہم برطانوی ممبران پارلیمنٹ سے بھی توقع کرتے ہیں کہ وہ ریاست جموں وکشمیر کی حق خود ارادیت کی تحریک میں معاونت کریں اور ریاست جموں وکشمیر کے تمام علاقوں میں اقوام متحدہ کی نگرانی میں استصواب رائے کے لئے رائے عامہ ہموار کرنے میں ہماری مکمل سپورٹ کریں۔