Live Updates

ڈاکٹرمصدق ملک سے شام کے سفیر کی ملاقات ،شام کی موجودہ صورتحال پر تفصیلی تبادلہ خیال

پاکستان ہمیشہ شام کے شانہ بشانہ کھڑا رہا ہے اور آئندہ بھی حمایت جاری رکھے گا، وفاقی وزیر

جمعرات 15 مئی 2025 19:43

ڈاکٹرمصدق ملک سے شام کے سفیر کی ملاقات ،شام کی موجودہ صورتحال پر تفصیلی ..

اسلام آباد (اُردو پوائنٹ اخبارتازہ ترین - این این آئی۔ 15 مئی2025ء)وفاقی وزیر برائے موسمیاتی تبدیلی و ماحولیاتی ہم آہنگی ڈاکٹر مصدق ملک سے شام کے سفیر ڈاکٹر رمیز الاری نے ملاقات کی جس میںشام کی موجودہ صورتحال پر تفصیلی تبادلہ خیال کیا گیا اور دیرپا امن و استحکام کی مشترکہ خواہش کا اظہار کیا گیا۔ دونوں فریقین نے اسرائیلی جارحیت اور شام کے علاقے پر ناجائز قبضے کی سخت مذمت کی۔

وفاقی وزیر نے اس موقع پر کہا کہ پاکستان شام کے ساتھ برادرانہ تعلقات کو قدر کی نگاہ سے دیکھتا ہے اور شام کی خودمختاری، وقار اور علاقائی سالمیت کی مکمل حمایت کرتا ہے۔ انہوں نے کہا کہ پاکستان ہمیشہ شام کے شانہ بشانہ کھڑا رہا ہے اور آئندہ بھی حمایت جاری رکھے گا۔شامی سفیر نے شام کے عوام کو درپیش شدید مشکلات اور اسرائیلی جارحیت کے تسلسل کا ذکر کرتے ہوئے کہا کہ ملک کے کئی علاقوں میں بجلی کی شدید قلت ہے اور بعض مقامات پر روزانہ صرف دو گھنٹے بجلی میسر آتی ہے، جس سے انسانی بحران مزید سنگین ہوتا جا رہا ہے۔

(جاری ہے)

ڈاکٹر مصدق ملک نے کہا کہ مشرقِ وسطیٰ میں اور دنیا بھر میں امن کے لیے شام میں استحکام ناگزیر ہے۔ انہوں نے مزید کہا کہ شام کے معاملے میں ترجیحات کی ترتیب کچھ یوں ہونی چاہیی: سب سے پہلے وسائل تک رسائی، پھر ان کی استطاعت، اور آخر میں ان وسائل تک عام رسائی۔ انہوں نے اس بات پر زور دیا کہ "رسائی" کا تصور عالمی شمال اور عالمی جنوب کے درمیان مختلف ہے۔

شامی سفیر نے پاک فضائیہ کی جرات، پیشہ ورانہ مہارت اور بھارت کے ساتھ بروقت جنگ بندی پر حکومت پاکستان کی کاوشوں کو سراہا۔وفاقی وزیر نے اس موقع پر کہا کہ بھارتی جارحیت اسرائیلی نظریے سے متاثر معلوم ہوتی ہے، جس کے تحت ایک نیا عالمی نظام قائم کرنے کی کوشش کی جا رہی ہے جس میں طاقتور ممالک بالادست رہیں۔دونوں فریقین نے خطے میں امن، استحکام اور تمام ممالک کی خودمختاری کے تحفظ کے عزم کا اعادہ کیا۔