Live Updates

کوہستان میں مبینہ مالی بےضابطگی کے خلاف نیب کی کارروائی کا خیر مقدم کرتے ہیں

صوبائی حکومت تحقیقات میں نیب کو بھر پور سپورٹ فراہم کرے گی، کیس میں جو لوگ بھی ملوث ہیں ان کیخلاف سخت کارروائی ہونی چاہیے۔ وزیراعلی خیبر پختونخوا علی امین گنڈاپور

ثنااللہ ناگرہ جمعرات 15 مئی 2025 21:11

کوہستان میں مبینہ مالی بےضابطگی کے خلاف نیب کی کارروائی کا خیر مقدم ..

پشاور ( اردوپوائنٹ اخبار تازہ ترین۔ آئی پی اے ۔ 15 مئی 2025ء ) وزیراعلی خیبر پختونخوا علی امین گنڈاپور نے کہا ہے کہ کوہستان میں مبینہ مالی بےضابطگی کے خلاف نیب کی کارروائی کا خیر مقدم کرتے ہیں، صوبائی حکومت تحقیقات میں نیب کو بھر پور سپورٹ فراہم کرے گی۔ تفصیلات کے مطابق وزیراعلی خیبر پختونخوا علی امین گنڈاپور کی زیرصدارت صوبائی کابینہ کا بتیسواں اجلاس ہوا۔

اجلاس میں کابینہ اراکین، چیف سیکرٹری، ایڈیشنل چیف سیکرٹریز اور انتظامی سیکرٹریز نے شرکت کی۔ وزیراعلی علی امین گنڈاپور نے کابینہ اجلاس میں اظہار خیال کرتے ہوئے کہا کہ پاکستان کے خلاف بھارتی جارحیت کا موثر جواب دینے پر مسلح افواج کو خراج تحسین پیش کرتے ہیں، بھارت کے خلاف اس شاندار فتح پر مسلح افواج اور پوری قوم مبارکباد کے مستحق ہیں، بھارتی جارحیت کے نتیجے میں ہونے والے شہداء کو سلام پیش کرتے ہیں، ان شہداء کے اہل خانہ کے ساتھ ساتھ ہیں اور ان کے ساتھ دلی ہمدردی کا اظہارکرتے ہیں۔

(جاری ہے)

ہم نے اس جارحیت میں خیبر پختونخوا کے شہید اور زخمی ہونے والوں کے لئے امدادی پیکج کا اعلان کیا ہے، شہداء کے ورثا کو 50، 50 لاکھ جبکہ زخمیوں کو 10، 10 لاکھ روپے دئے جائیں گے، متلعقہ ممبران اسمبلی مقامی انتظامیہ کے حکام کے ساتھ آن شہداء اور زخمیوں کے گھروں میں جا کر انہیں امدادی پیکج جلد ادا کریں۔ کوہستان میں سامنے آنے والی مبینہ مالی بے ضابطگی کے خلاف نیب کی کارروائی کا خیر مقدم کرتے ہیں، خوش آئند بات ہے کہ نیب نے اس کیس میں کچھ ریکوریاں بھی کی ہے، صوبائی حکومت اس سلسلے میں نیب کو بھر پور سپورٹ فراہم کرے گی، نیب کو تحقیقات کے لئے جو بھی ڈاکومنٹس درکار ہوں گے، صوبائی حکومت ترجیحی بنیادوں پر فراہم کرے گی، اس کیس میں جو بھی لوگ اور ادارے ملوث ہیں ان کے خلاف سخت سے سخت کارروائی ہونی چاہیے۔

علی امین گنڈاپور نے کہا کہ بانی چیئرمین عمران خان کے وژن کے مطابق صوبائی حکومت کرپشن کے خلاف زیرو ٹالرنس کی پالیسی پر عمل پیرا ہے، بدعنوانی کے اس کیس میں ملوث عناصر کے خلاف کسی اور ادارے سے زیادہ سخت کارروائی صوبائی حکومت خود کرے گی، متعلقہ کابینہ اراکین پریس کانفرنس کے ذریعے اس کیس کے حقائق عوام کے سامنے رکھیں۔ اس کیس کی حکومتی سطح پر تحقیقات کے لئے کابینہ کمیٹی بنانے کا فیصلہ۔ کمیٹی کی سربراہی وزیر اعلی خود کریں گے جس میں متعلقہ کابینہ اراکین اور ممبران صوبائی اسمبلی شامل ہونگے۔