Live Updates

جدید ترقی یافتہ ٹیکنالوجی پر مبنی اسٹیل ملز ملک کی ضرورت ہے،سینیٹر محمد عبدالقادر

دوسری پاکستان اسٹیل ملز سب سے بڑے صنعتی کمپلیکس کی حیثیت سے ملک کے بنیادی ڈھانچے کی تشکیل اور صنعتی ترقی میں اہم کردار ادا کرے گی،بیان

جمعرات 15 مئی 2025 21:45

جدید ترقی یافتہ ٹیکنالوجی پر مبنی اسٹیل ملز ملک کی ضرورت ہے،سینیٹر ..

کوئٹہ(اُردو پوائنٹ اخبارتازہ ترین - این این آئی۔ 15 مئی2025ء) چیئرمین قائمہ کمیٹی برائے دفاعی پیداوار سینیٹر محمد عبدالقادر نے کہا ہے کہ پاکستان اسٹیل ملز کا قیام روس کے تعاون سے 1970ء کی دہائی میں عمل میں آیا تھا پہلی پاکستان اسٹیل ملز نے سب سے بڑے صنعتی کمپلیکس کی حیثیت سے ملک کے بنیادی ڈھانچے کی تشکیل اور صنعتی ترقی میں اہم کردار ادا کیا لیکن بدانتظامی، بدعنوانی اور بدلتی ہوئی اقتصادی پالیسیاں بتدریج پاکستان اسٹیل ملز کے زوال کا باعث بنیں تاہم جدید ترقی یافتہ ٹیکنالوجی پر مبنی ایک اسٹیل مل بہرصورت ملک کی ضرورت ہے اوریہ امر خوش آئند ہے کہ پاکستان اور روس کے درمیان کراچی میں نئی اسٹیل مل کے قیام کیلئے حالیہ برسوں کے دوران شروع ہونے والی بات چیت میں مثبت پیش رفت جاری ہے۔

(جاری ہے)

یہاں جاری ہونے والے ایک بیان میں چیئرمین قائمہ کمیٹی برائے دفاعی پیداوار محمد عبدالقادر نے کہا کہ ایک سال پہلے پاکستان اور روس کے درمیان پاکستان میں نئی اسٹیل مل قائم کرنے پر غور شروع کیا گیاکراچی میں نئی اسٹیل مل کے قیام پر اتفاق کر لیا گیا ہے روسی حکام کوآگاہ کردیا گیا ہے کہ حکومت نے پاکستان اسٹیل ملز کی 700 ایکڑ اراضی کو نئی اسٹیل مل قائم کرنے کیلئے مختص کرنے کا فیصلہ کر لیا ہے پاکستان کے پاس آئرن ایسک کے 1.887 بلین ٹن کے ذخائر موجود ہیں ،اس کے باوجود ملکی ضروریات پوری کرنے کیلئے سالانہ 2.7 بلین ڈالر کی مالیت کا آئرن اور اسٹیل درآمد کرنا پڑتا ہے ان حقائق کے پیش نظر نئی اسٹیل مل کے قیام کی ضرورت واہمیت پوری طرح عیاں ہے لیکن سابقہ اسٹیل ملز کے تجربے کو پیش نظر رکھتے ہوئے نئی اسٹیل مل کے معاملات کا کرپشن اور بدانتظامی سے مکمل طور پر محفوظ رکھا جانا ضروری ہے اور یہ اسی صورت میں ممکن ہے جب روز اول سے ہر مرحلے پر شفافیت اور میرٹ کا مکمل اہتمام کیا جائے۔