Live Updates

بہروز سبزواری اور جاوید شیخ کا بھارت کو منہ توڑ جواب

پاک فوج کے بھرپور جواب نے بالی ووڈ کے خواب چکنا چور کردیئے، گفتگو

جمعرات 15 مئی 2025 23:00

بہروز سبزواری اور جاوید شیخ کا بھارت کو منہ توڑ جواب

کراچی (اُردو پوائنٹ اخبارتازہ ترین - این این آئی۔ 15 مئی2025ء)نامور اداکاروں بہروز سبزواری اور جاوید شیخ نے بھارت کو منہ توڑ جواب دیتے ہوئے کہا ہے کہ پاک فوج کے بھرپور جواب نے بالی ووڈ کے خواب چکنا چور کردیے۔بہروز سبزواری اور جاوید شیخ نے نجی ٹی وی پروگرام یومِ تشکر میں شرکت کرتے ہوئے پاک بھارت حالیہ تنازعے پر کھل کر اظہار خیال کیا۔ دونوں فنکاروں نے پاکستانی عوام اور افواج کو سراہتے ہوئے بھارت کو بھرپور جواب دیا اور قومی یکجہتی کا پیغام دیا۔

بہروز سبزواری نے گفتگو کا آغاز جذباتی انداز میں کیا اور پاک فوج کو خراج تحسین پیش کرتے ہوئے کہا کہ افواج پاکستان نے ہمارے دل خوش کر دیے، بھارت نے ہمیں کمزور سمجھا تھا، مگر ہماری افواج نے انہیں حقیقت دکھا دی، یہ فلم نہیں بلکہ اصل زندگی ہے۔

(جاری ہے)

انہوں نے کہا لگتا ہے جیسے بھارتی عوام، اداکار اور فوج سب ہی بالی ووڈ میں رہنے لگے ہیں، مگر ہماری حقیقت نے ان کے خواب توڑ دیئے۔

جاوید شیخ نے کہا کہ بھارت نے ہمیں کمزور سمجھ کر بلوچستان اور گلگت بلتستان کی بات کی، مگر یہ جواب ان کے لیے آنکھیں کھولنے والا تھا، یہ وقت تھا جب ہمیں کسی چیز کی سخت ضرورت تھی جو ہمیں ایک قوم بنا دے اور بھارت کی یہ حرکت ہمارے اتحاد کا باعث بن گئی۔ انہوں نے کہا کہ یہ جنگ صرف پاکستان کی نہیں تھی بلکہ اسلام کے نام کی بھی تھی، بھارت کے ساتھ اسرائیل کی ٹیکنالوجی کھڑی تھی، مگر دنیا بھر کے مسلمانوں نے پاکستان کا دفاع دیکھ کر فخر محسوس کیا۔

انہوں نے کہا کہ کئی ممالک جو پہلے پاکستان کو کمتر سمجھتے تھے، اب اس کی حکمت عملی اور جرات کو سراہ رہے ہیں۔بہروز سبزواری نے کہا کہ اللہ نے بھارت کو دکھا دیا کہ تکبر کا انجام کیا ہوتا ہے، ہماری جیت صرف جنگی نہیں بلکہ اخلاقی اور نظریاتی بھی ہے۔