پاکستان اور بھارت دونوں ممالک کی طرف بڑا واضح ہے کہ سیز فائر قائم رہے گا

اسلام آباد ( اردوپوائنٹ اخبار تازہ ترین۔ آئی پی اے ۔ 15 مئی 2025ء ) وزیرخارجہ اسحاق ڈار نے کہا ہے کہ دونوں ممالک کی طرف بڑا واضح ہے کہ سیز فائر قائم رہے گا، افواج کے امن کی پوزیشن پر آنے کے بعد مذاکرات کا مرحلہ آجا ئے گا۔ انہوں نے جیو نیوز کے پروگرام میں گفتگو کرتے ہوئے کہا کہ اب پاک بھارت ڈی جی ایم اوز کی اگلی گفتگو 18مئی کو ہوگی، دونوں ممالک کی طرف بڑا واضح ہے کہ سیز فائر قائم رہے گا، اب دونوں ممالک میں افواج کو سیز فائر کو نارمل سطح پر لے جانے کا سلسلہ جاری رہے گا،شملہ معاہدہ میں ہے کہ آپس کے معاملات میں تیسرا فریق نہیں ہوگا، ہماری طرف سے پہلے بھی کبھی مسئلہ نہیں ہوا، بھارت ہمیشہ اصرار کرتا ہے کہ ہم دو فریقی بات چیت کریں گے۔

طے ہوا تھا کہ دونوں ممالک کی نیوٹرل مقام پر ملاقات ہوگی۔

(جاری ہے)

دونوں ممالک کو ڈائیلاگ کیلئے بیٹھنا ہوگا اور کسی پوائنٹ پر فیصلہ ہوجائے گا۔ افواج کو زمانہ امن کی پوزیشن پر لے جانے کے بعد مذاکرات کا مرحلہ آجا ئے گا۔ہم بھی دہشتگردی کا خاتمہ چاہتے ہیں مگر مذاکرات جامع ہوں گے، جب مذاکرات ہوں گے تو ساری چیزوں پر بات ہوگی۔جنگ ہم نے شروع نہیں کی بھارت نے کی تھی۔

ہم نے دنیا کو کہا تھا کہ ہم پہل نہیں کریں گے۔ پاکستان نے بھارت کے 5کی بجائے 6جہاز گرائے جس میں تین رفال شامل ہیں۔ دوسری جانب وزیراعظم شہبازشریف نے کامرہ ایئربیس کا دورہ کیا اور پاک فضائیہ کے شاہینوں سے ملاقات کی، اس موقع پر وزیراعظم شہبازشریف کے ہمراہ آرمی چیف جنرل عاصم منیر اور ایئرچیف ظہیر احمد بابر بھی تھے۔ وزیراعظم شہباز شریف نے خطاب کرتے ہوئے کہا کہ معرکہ حق کے شاہینوں کو عظیم فتح پر مبارکباد پیش کرتا ہوں۔

ک فضائیہ نے دشمن کے نہ صرف دانت توڑے بلکہ اپنی دلیری اور پیشہ ورانہ مہارت سے دشمن کے غرور کو خاک میں ملایا، 6مئی سے لے کر 10مئی تک جو دن گزرے ہیں ہیں، 10مئی کو پاک فضائیہ نے پوری دنیا کو حیرت میں ڈال دیا۔ دشمنوں کے چاروں طبق روشن کردیئے۔پاکستان کی تاریخ میں اس سے شاندار فتح پہلے ہمیں کبھی نصیب نہیں ہوئی۔ اس کامیابی پر ہم سب کے سر اللہ تعالیٰ کے سامنے جھکے ہوئے ہیں، دشمن کو بتا دیا کہ اگر دوبارہ میلی آنکھ سے دیکھا تو پاؤں تلے روند دیں گے۔

معرکہ حق کو فرنٹ سے لیڈ کرنے پر سپہ سالار جنرل عاصم منیر، ایئرچیف اور نیول چیف اور پوری حکومت کو مبارکباد پیش کرتا ہوں۔ 10مئی کو پوری دنیا میں ایک ہی گونج اٹھی کہ یہ جنگ پاکستان نے اپنی مہارت سے دشمن کے غرور کو خاک میں ملایا۔ میں قوم کو بلاخوف تردید بتا سکتا ہوں کہ شاہینوں نے دشمن کے پانچ نہیں 6جہاز مار گرائے۔ بہادر سپوتوں نے مختصر جنگ میں دشمن کے دانت توڑ دیئے۔

ہمارا دشمن آبادی کے لحاظ سے ہم سے کئی گنا بڑا ہے، حالیہ سالوں میں کئی سو ارب ڈالر خرچ کرکے جدید اسلحہ خریدا اور عالمی طاقتوں کو بتایا کہ خطے میں وہی تھانیدار ہے۔ لیکن ہمارے شاہینوں اور جوانوں نے اس نام نہاد تھانیدار کا بت پاش پاش کردیا، اب وہ دشمن رہتی دنیا تک اس طرح غرور گھمنڈ میں مبتلا نہیں ہوگا۔