Live Updates

پاکستان کا نام روشن کرنیوالے کھلاڑیوں کیلئے انعام کی رقم 2 کروڑ روپے تک کردی گئی: رانا ثنااللہ

مشیروزیراعظم بین الصوبائی رابطہ نے 32 کھلاڑیوں اور کوچز میں دو کروڑ 7 لاکھ سے زائد کے نقد انعامات تقسیم کیے

ذیشان مہتاب ہفتہ 17 مئی 2025 11:54

پاکستان کا نام روشن کرنیوالے کھلاڑیوں کیلئے انعام کی رقم 2 کروڑ روپے ..

لاہور (اردو پوائنٹ تازہ ترین اخبار ۔ 17 مئی 2025ء ) وزیراعظم کے مشیر برائے بین الصوبائی رابطہ رانا ثنا اللہ نے کہا ہے کہ کھیلوں کے شعبے میں پاکستان کے اندر یا عالمی سطح پر نام روشن کرنے والے کھلاڑیوں کے لیے ہزاروں روپے نقد انعام کی رقم بڑھا کر ایک ملین تا 20 ملین کر دی گئی ہے اور حکومت باصلاحیت کھلاڑیوں کی بھرپور حوصلہ افزائی کے لیے اقدامات جاری رکھے گی۔

پاکستان سپورٹس بورڈ کی جانب سے کھلاڑیوں کو نقد انعامات دینے کی تقریب سے خطاب کرتے ہوئے مشیروزیراعظم بین الصوبائی رابطہ رانا ثنااللہ نے 32 کھلاڑیوں اور کوچز میں دو کروڑ 7 لاکھ سے زائد کے نقد انعامات تقسیم کیے۔

رانا ثنا اللہ خان نے کہا کہ اولمپکس میں ارشد ندیم کی جانب سے شان دار کامیابی کے بعد وزیراعظم نے ارشد ندیم کو وزیراعظم ہاؤس بلوا کر انہیں زبردست خراج تحسین پیش کرکے کھلاڑیوں کو عزت دی۔

(جاری ہے)

انہوں نے کہا کہ وزیراعظم کی ہدایات پر ملک گیر سطح پر کھیلوں کے فروغ کے لیے متعدد اقدامات کیے گئے ہیں، پاکستان سپورٹس بورڈ کی جانب سے کھلاڑیوں کے لیے بہت سی سہولیات کو اپ گریڈ کیا گیا ہے، بین الاقوامی، قومی اور علاقائی سطح پر کھیلوں میں نمایاں پوزیشن حاصل کرنے والے کھلاڑیوں کے لیے نقد انعامات کی مالیت میں خاطر خواہ اضافہ کیا گیا ہے۔

وزیراعظم کے مشیر رانا ثنا اللہ نے وفاقی سیکرٹری محی الدین وانی اور ڈی جی پی ایس بی یاسر پیرزادہ کے ہمراہ براؤن میڈلز جیتنے والے انیس علی شاہ، عبداللہ نواز، سکھی اللہ ترین اور نعمان خان کو فی کس 3 لاکھ 75 ہزار روپے، کوچز فہیم گل خان اور فراز احمد کو فی کس ایک لاکھ 25 ہزار روپے، گولڈ میڈل جیتنے پر نور زمان کو 50 لاکھ روپے اور ان کے کوچنگ اسٹاف کو فی کس 8 لاکھ 33 ہزار 333 روپے انعام دیا۔

اسی طرح انٹرنیشنل تائیکوانڈو چیمپئن شپ 2025 میں گولڈ، سلور اور براؤن میڈلز حاصل کرنے والے کھلاڑیوں سمیت کوچنگ اسٹاف کو بھی لاکھوں روپے کے نقد انعامات سے نوازا گیا۔