اسرائیل کا غزہ آپریشن میں تیزی لانے کا فیصلہ

اسلام آباد (اُردو پوائنٹ ۔ DW اردو۔ 17 مئی 2025ء) اہم ترین خبریں:

• اسرائیل نے غزہ میں فوجی کارروائیوں میں اضافہ کر دیا۔
• یہ فیصلہ ایسے وقت کیا گیا ہے جب یورپی کونسل اور اقوام متحدہ میں انسانی حقوق کے سربراہ نے غزہ میں اسرائیلی عسکری طریقوں پر شدید تنقید کی ہے۔
• امریکہ نے 10 لاکھ فلسطینیوں کو لیبیا منتقل کرنے کا منصوبہ تیار کر لیا۔

امریکہ 10 لاکھ فلسطینیوں کو لیبیا منتقل کرنے کا منصوبہ بنا رہا ہے، رپورٹ

امریکی نشریاتی ادارے این بی سی نیوز سے بات کرتے ہوئے پانچ مختلف ذرائع نے بتایا کہ ٹرمپ انتظامیہ غزہ سے 10 لاکھ فلسطینیوں کو مستقل طور پر لیبیا میں آباد کرنے کا منصوبہ تیار کر رہی ہے۔

ذرائع کے مطابق اس منصوبے پر اتنی سنجیدگی سے غور کیا جا رہا ہے کہ ٹرمپ انتظامیہ نے لیبیا کی قیادت کے ساتھ اس پر تبادلہ خیال بھی کر لیا ہے۔

(جاری ہے)

این بی سی کے ذرائع کے مطابق ابھی تک کوئی حتمی معاہدہ نہیں ہوا اور اسرائیل کو اس بات چیت سے آگاہ رکھا گیا ہے۔

سات یورپی ممالک کی اسرائیل سے غزہ کی ناکہ بندی ختم کرنے کی اپیل

سات یورپی ممالک نے اسرائیل سے مطالبہ کیا ہے کہ وہ ’’اپنی موجودہ پالیسی ترک کرے اور غزہ پٹی کی ناکہ بندی فوری طور پر ختم کرے۔

ایک مشترکہ بیان میں آئس لینڈ، آئرلینڈ، لکسمبرگ، مالٹا، سلووینیا، اسپین اور ناروے کے رہنماؤں نے کہا، ’’غزہ میں ہماری آنکھوں کے سامنے جاری انسانی ساختہ انسانی تباہی کے سامنے خاموش نہیں رہیں گے۔‘‘

سات یورپی ممالک کے مشترکہ بیان میں مزید کہا گیا، ’’50 ہزار سے زائد مرد، خواتین اور بچے اپنی جانوں سے ہاتھ دھو بیٹھے ہیں۔

انہوں نے اسرائیلی حکومت سے مزید فوجی کارروائیوں سے باز رہنے کا بھی مطالبہ کیا اور فلسطینی عوام کی جبری نقل مکانی یا بے دخلی کے کسی بھی منصوبے کو مسترد کر دیا۔
یہ خط ایسے وقت میں جاری کیا گیا ہے جب اسرائیل غزہ میں اپنی فوجی کارروائیوں میں اضافہ کر رہا ہے۔

غزہ میں امداد سے متعلق امریکی منصوبے پر وقت ضائع نہ کیا جائے، اقوام متحدہ

اقوام متحدہ کے امدادی ادارے کے سربراہ ٹام فلیچر کا کہنا ہے کہ غزہ کو امداد کی فراہمی کے لیے امریکی حمایت یافتہ متبادل تجویز پر وقت ضائع نہیں کرنا چاہیے۔

اسرائیل کی جانب سے غزہ کو انسانی امداد کی فراہمی مسلسل 75ویں روز بھی روکے جانے کے بعد انہوں نے کہا، ’’جو امداد کی تقسیم کے لیے متبادل طریقہ تجویز کر رہے ہیں ان سے کہنا چاہتا ہوں کہ وقت ضائع نہیں کرنا چاہیے۔

انہوں نے یہ بھی کہا کہ اقوام متحدہ کے پاس ایک مؤثر منصوبہ موجود ہے اور فلسطینی علاقے میں داخل ہونے کے لیے امدادی سامان کے ایک لاکھ 60 ہزار ’ریلیف پیلٹس‘ تیار ہیں۔
ایکس پر اپنے ایک بیان میں انہوں نے لکھا، ’’سرحد پر ہمارے پاس کھانے پینے کی اشیاء کے ہزاروں ٹرک کھڑے ہیں۔

لائیو بلاگ میں خوش آمدید

اسرائیلی دفاعی افواج کا کہنا ہے کہ وہ غزہ پٹی میں ’وسیع پیمانے پر حملے‘ اور اپنے ’فوجیوں کو متحرک‘ کر رہی ہیں۔

اس اعلان سے پہلے ہی اسرائیل نے غزہ پر شدید بمباری شروع کر رکھی تھی۔

جمعے کے روز فلسطینی خبر رساں ادارے وفا نے خبر دی تھی کہ جمعرات کی شام سے شمالی غزہ کی پٹی میں اسرائیل کے متعدد فضائی حملوں میں کم از کم 100 افراد ہلاک ہو چکے ہیں۔
اس لائیو بلاگ میں مشرق وسطیٰ اور پاکستان سمیت دنیا بھر سے سامنے آنے والی اہم ترین خبریں شامل کی جائیں گی۔