بھارت جنگ کا غصہ کشمیریوں پر نکالنے لگا،جعلی اِنکاؤنٹرز اور بے گناہ شہریوں کی گرفتاریاں

ہفتہ 17 مئی 2025 20:29

سرینگر(اُردو پوائنٹ اخبارتازہ ترین - آن لائن۔ 17 مئی2025ء)بھارت جنگ کا غصہ مقبوضہ کشمیر میں معصوم شہریوں پر نکالنے لگا،بھارتی فوج نے ایک بار پھر جعلی سرچ آپریشنز اور جھوٹے انکاؤنٹرز کا سلسلہ تیز کر دیا ہے۔کشمیری ذرائع ابلاغ کے مطابق پہلگام میں مبینہ حملے کو بنیاد بنا کر بھارتی فورسز نے بڑے پیمانے پر کارروائیاں شروع کی ہیں، جنہیں انسانی حقوق کی سنگین خلاف ورزی قرار دیا جا رہا ہے۔

کشمیر میڈیا سروس کی رپورٹ کے مطابق، گزشتہ 48 گھنٹوں کے دوران بھارتی فورسز نے 40 سے زائد گھروں پر چھاپے مارے اور 25 سے زائد کشمیری نوجوانوں کو گرفتار کیا۔ دوسری جانب دی اکنامک ٹائمز نے انکشاف کیا ہے کہ بھارتی فوج نے گزشتہ تین دنوں میں 60 سے زائد کشمیری شہریوں کو مختلف کارروائیوں کے دوران حراست میں لیا۔

(جاری ہے)

صورتحال اس وقت مزید تشویشناک ہوگئی جب الجزیرہ نے اپنی رپورٹ میں بتایا کہ 22 اپریل 2025 سے لے کر اب تک بھارتی فورسز نے دو ہزار سے زائد معصوم کشمیریوں کو گرفتار کیا ہے۔

صرف پچھلے ہفتے کے دوران 6 مختلف اضلاع میں جعلی انکاؤنٹرز میں کم از کم 5 نوجوانوں کو شہید کیا گیا، جس کی تصدیق کشمیر میڈیا سروس نے کی ہے۔15 مئی 2025 کو پلوامہ میں بھارتی فوج نے تین کشمیری نوجوانوں کو شہید کیا، جن کے بارے میں دی اکنامک ٹائمز کا کہنا ہے کہ ان کا تعلق مقامی آبادی سے تھا۔ ان ہلاکتوں کے بعد پہلگام حملے کی آڑ میں بھارتی فورسز نے 48 مزید نوجوانوں کو مبینہ طور پر جعلی مقابلوں میں شہید کر دیا، جیسا کہ کشمیر میڈیا سروس نے رپورٹ کیا۔

ان سرچ آپریشنز کے دوران خواتین اور بزرگ شہریوں پر بھی تشدد کیا گیا، جو کہ بین الاقوامی انسانی حقوق کے قوانین کی صریح خلاف ورزی ہے۔ الجزیرہ نے اپنی رپورٹ میں اس پہلو کو بھی اجاگر کیا ہے۔ کشمیری عوام کی آواز دبانے کے لیے بھارتی فورسز نے موبائل اور انٹرنیٹ سروسز کو مسلسل بند رکھا ہوا ہے، جس سے اطلاعات کی آزادانہ ترسیل رک گئی ہے۔بھارتی حکومت کی جانب سے ان کارروائیوں کو ’’دہشت گردی کے خلاف آپریشن‘‘ قرار دیا جا رہا ہے، تاہم شہید ہونے والے نوجوانوں کے اہلخانہ نے ان الزامات کو مسترد کرتے ہوئے کہا ہے کہ ان کے بچے بے گناہ تھے اور ان پر لگائے جانے والے تمام بھارتی دعوے جھوٹ پر مبنی ہیں۔