منہاج ویلفیئر فاؤنڈیشن کی اجتماعی قربانی مہم کا آغاز، خصوصی ڈیسک قائم

لاہور (اُردو پوائنٹ اخبارتازہ ترین - اے پی پی۔ 18 مئی2025ء) منہاج ویلفیئر فائونڈیشن نے اجتماعی قربانی مہم کا آغاز کر دیا ہے ، اس سلسلہ میں اندرون و بیرون ملک مقیم پاکستانیوں کیلئے فریضہ قربانی کی ادائیگی میں سہولیات مہیا کرنے کیلئے خصوصی ڈیسک قائم کر دیئے گئے ہیں ،رواں سال منہاج ویلفیئر فائونڈیشن نے گائے کا حصہ 29ہزار، چھترا 43ہزار اور بکرا کی قربانی کا ریٹ 48ہزار روپے مقرر کیا ہے۔

ان خیالات کا اظہارمنہاج ویلفیئر فائونڈیشن کے ڈائریکٹر آپریشنزانجینئر ثناء اللہ خان نے اتوار کے روز یہاں مرکزی سیکرٹریٹ ماڈل ٹائون میں منعقدہ اجلاس سے خطاب کرتے ہوئے کیا جس میں قربانی مہم کیلئے تشکیل دی گئی انتظامی کمیٹیوں کے سربراہان شریک تھے ۔انجینئر ثناء اللہ خان نے کہا کہ منہاج ویلفیئر فائونڈیشن نے ہر سال کی طرح امسال بھی اجتماعی قربانی مہم کا آغاز کر دیا ہے،رواں سال منہاج ویلفیئر فائونڈیشن نے بیرون ملک مقیم پاکستانیوں کی سہولت کے لئے قربانی کے حوالے سے خصوصی ہیلپ لائن مقرر کی ہے تاکہ وہ سہولت اور اعتماد کے ساتھ قربانی کا فریضہ انجام دے سکیں، پاکستان میں مقیم افراد کے لئے بھی سہولت دستیاب ہے۔

(جاری ہے)

انہوں نے کہا کہ مرکزی سیکرٹریٹ 365 ایم ماڈل ٹائون لاہور میں 140-140-111-042 منہاج ویلفیئر فائونڈیشن اور آغوش آرفن کیئر ہوم شاہ جیلانی روڈ ٹائون شپ لاہور میں 0305-5244286 پر کال کر کے قربانی کے جانوروں میں حصہ ڈالا جا سکتا ہے۔ ڈائریکٹر آپریشنز منہاج ویلفیئر فائونڈیشن نے کہا کہ الحمدللہ منہاج ویلفیئر فائونڈیشن ڈاکٹر محمد طاہرالقادری کی سرپرستی میں اندرون و بیرون ملک مقیم اسلامیان پاکستان کو قربانی کے فریضہ کی ادائیگی کیلئے تمام سہولیات مہیا کرتی ہے، منہاج ویلفیئر فائونڈیشن جدید ترین سلاٹر ہائوس اور حفظان صحت کے اصولوں کو ملحوظ خاطر رکھتے ہوئے کم سے کم وقت میں حصہ داروں اور مستحقین تک گوشت کی فراہمی کو یقینی بناتی ہے ،اس مقصد کیلئے لاہور سمیت ملک بھر میں ہزاروں والینٹیئرز خدمات انجام دیتے ہیں۔

انہوں نے کہا کہ گوشت کی حفاظت اور ترسیل کیلئے چلرز استعمال کیے جاتے ہیں۔