جہلم اور سوہاوہ ریلوے اسٹیشنز پر نئے سٹاپس کا باقاعدہ افتتاح، 17 سال بعد سوہاوہ اسٹیشن کی رونق بحال ہونا خوش آئند ہے، وزیر مملکت بلال اظہر کیانی

اتوار 18 مئی 2025 20:00

جہلم (اُردو پوائنٹ اخبارتازہ ترین - اے پی پی۔ 18 مئی2025ء) وزیر مملکت برائے ریلوے اور وزیراعظم ڈلیوری یونٹ کے سربراہ بلال اظہر کیانی نے سوہاوہ ریلوے اسٹیشن پر عوامی ایکسپریس کے سٹاپ کا افتتاح کر دیا، اب کراچی سے پشاور کے روٹ پر چلنے والی عوامی ایکسپریس آتے اور جاتے ہوئے سوہاوہ اسٹیشن پر رکے گی۔ اس موقع پر وزیر مملکت بلال اظہر کیانی کا کہنا تھا کہ سوہاوہ کی عوام کے لئے یہ بڑا تحفہ ہے، آج 17 سال بعد سوہاوہ اسٹیشن کی رونق بحال ہونے پر یہاں کی عوام کو مبارکباد دیتا ہوں۔

سوہاوہ اسٹیشن کے افتتاح کے بعد وزیر مملکت بلال اظہر کیانی جہلم ریلوے اسٹیشن پہنچے جہاں انہوں نے رحمان بابا ایکسپریس کے سٹاپ کا افتتاح کیا۔ رحمان بابا ایکسپریس بھی کراچی سے پشاور کے روٹ کی ٹرین ہے۔

(جاری ہے)

اب یہ کراچی سے پشاور آتے ہوئے اور پشاور سے کراچی جاتے ہوئے جہلم اسٹیشن پر رکا کرے گی۔ جہلم اور سوہاوہ اسٹیشن پر عوام نے وزیر مملکت بلال اظہرکیانی کا استقبال کیا اور نئے سٹاپس کے قیام پر ان کا شکریہ ادا کیا۔

جہلم اسٹیشن پر میڈیا سے گفتگو کرتے ہوئے وزیر مملکت بلال اظہر کیانی کا کہنا تھا کہ سوہاوہ اور جہلم سمیت دیگر چھوٹے شہروں کے ریلوے اسٹیشنز پر سہولیات مہیا کرنے کے لئے ہر ممکن اقدام کریں گے۔ انہوں نے موقع پر موجود ڈویژنل سپرنٹنڈنٹ ریلوے راولپنڈی ڈویژن کو ہدایت کی کہ نئے قائم ہونے والے سٹاپس پر عوام کو بہترین سہولیات کی فراہمی میں کوئی کسر نہ چھوڑی جائے۔