وزیراعلی پنجاب نے خطے کی سب سے بڑی ،جدید ترین کلامیٹ آبزرویٹری بنانے کی منظوری دیدی

پیر 19 مئی 2025 13:28

لاہور(اُردو پوائنٹ اخبارتازہ ترین - این این آئی۔ 19 مئی2025ء)وزیراعلیٰ پنجاب مریم نواز شریف نے خطے کی سب سے بڑی اور جدید ترین کلائمیٹ آبزرویٹری (موسمیاتی رسدگاہ) کے قیام کی منظوری دے دی ، اس اہم منصوبے کا مقصد موسمیاتی تبدیلیوں کی بروقت پیشگوئی، تجزیے اور پالیسی سازی میں مدد فراہم کرنا ہے۔اعلیٰ سطحی اجلاس میں سینئر وزیر مریم اورنگزیب کی زیر صدارت اہم فیصلے کیے گئے۔

اجلاس کو بتایا گیا کہ کلائمیٹ آبزرویٹری پنجاب پلاننگ اینڈ ڈویلپمنٹ ہاؤس میں قائم کی جائے گی جبکہ اس کی عمارت ای آئی سی ٹی میں تعمیر ہوگی۔ یونیورسٹی آف انجینئرنگ اینڈ ٹیکنالوجی (یو ای ٹی) لاہور نے آبزرویٹری کے قیام سے متعلق اپنی جامع رپورٹ پیش کر دی ہے۔منصوبے کے لیے بجٹ، آلات اور زمین کی فراہمی کا فزیبلٹی پلان بھی تیار کر لیا گیا ہے۔

(جاری ہے)

آبزرویٹری میں جدید خودکار کمیونیکیشن اور لنکج سسٹم نصب کیا جائے گا جبکہ جی آئی ایس لیب، سیکٹورل انٹرفیس سسٹم اور جدید ڈیٹا ہب کے قیام کا بھی فیصلہ کیا گیا ہے۔ ایم آر آئی سسٹم کے ذریعے سائنسی تحقیق کو مزید مؤثر بنایا جائے گا۔عالمی معیار کا پروفیشنل اسٹاف بھرتی کیا جائے گا اور انٹرنشپ پروگرامز کے ذریعے ہر شعبے کے لیے ماحولیاتی ماہرین تیار کیے جائیں گے۔

اجلاس میں ڈیٹا آرکائیو سسٹم، کوآرڈینیشن یونٹ اور انٹرنیشنل کمیونیکیشن سیل کے قیام کی بھی منظوری دے دی گئی ہے۔وزیر اعلیٰ مریم نواز شریف نے ماحولیاتی تبدیلیوں کے خطرات سے نمٹنے کے لیے ایک جامع پلان پیش کیا ہے۔ سینئر وزیر مریم اورنگزیب نے اسے ماحولیاتی تحفظ کے حوالے سے ایک انقلابی قدم قرار دیا۔ ان کا کہنا تھا کہ ادارے کو جدید ترین مینجمنٹ ماڈل کے تحت چلایا جائے گا اور اس کے لیے سمارٹ آرگینوگرام بھی تیار کیا جائے گا۔سینئر وزیر مریم اورنگزیب نے مزید کہا کہ یہ آبزرویٹری نہ صرف صوبہ پنجاب بلکہ پورے خطے کے لیے ماحولیاتی تحقیق، معلومات کے تبادلے اور پالیسی سازی میں ایک سنگِ میل ثابت ہوگی۔