Live Updates

آزاد کشمیر وپاکستان کی حکومتیں متاثرین ایل او سی کیلئے خطیر رقم مختص کریں،محترمہ خولہ خان

پیر 19 مئی 2025 14:34

مظفرآباد (اُردو پوائنٹ اخبارتازہ ترین - این این آئی۔ 19 مئی2025ء)چیئرپرسن خان آف منگ فاونڈیشن محترمہ خولہ خان نے وزیراعظم پاکستان کی جانب سے شہداء اور زخمیوں کے لئے پیکج کو خوش آئند قرار دیتے ہوئے حکومت پاکستان وآزادکشمیر سے مطالبہ کیا ہے کہ ایل او سی متاثرین جو دوران گولہ باری بے گھر ہوئے ہیں ان کے مکانوں کی تعمیر کے لئے خطیر رقم مختص کرے اور جلد از جلد متاثرین کو وہ رقم دی جائے تاکہ کوئی بھی متاثرہ شخص بے گھر نہ ہو ان خیالات کا اظہار انھوں نے میڈیا سے گفتگو کرتے ہوئے کیا انھوں نے کہا کہ حکومت آزادکشمیر متاثرین ایل او سی کو ان کے گھروں میں مورچی(حفاظتی بنکرز)تعمیر کر کے دے تاکہ وہ گولہ باری کے دوران اپنے گھروں کے بنکرز میں چھپ کر اپنی جان بچا سکیں۔

(جاری ہے)

ان کا مزید کہنا تھا کہ ایل او سی کے مکین آئے روز مسائل کی دلدل میں دھنستے جا رہے ہیں گولہ باری سے بہت سے مکین شہید و زخمی ہوئے مکینوں کے گھروں کو نقصان پہنچا ایسے وقت میں اگر ایل او سی متاثرین کے گھروں میں حفاظتی مورچے ہوتے تو بہت سارے ایل او سی مکین بھارتی گولہ باری سے محفوظ رہتے۔ان کا کہنا تھا کہ وفاقی حکومت اور حکومت آزادکشمیر جلد از جلد متاثرین ایل او سی کے جملہ مسائل حل کرے تاکہ وہ اپنی زندگی سکھ اور چین سے گزار سکیں۔