بھارت مقبوضہ جموں وکشمیر میں اپنے جنگی جرائم چھپانے کی کوشش کر رہا ہے،حریت کانفرنس

سرینگر (اُردو پوائنٹ اخبارتازہ ترین - اے پی پی۔ 19 مئی2025ء) غیرقانونی طورپر بھارت کے زیر قبضہ جموں وکشمیرمیں کل جماعتی حریت کانفرنس نے دنیا بھرمیں مقیم کشمیریوں پر زوردیاہے کہ وہ مقبوضہ علاقے میں بھارتی مظالم اور سیاسی ناانصافیوں کے خلاف متحد ہو جائیں۔کشمیرمیڈیاسروس کے مطابق کل جماعتی حریت کانفرنس کے ترجمان ایڈوکیٹ عبدالرشید منہاس نے سر ینگر میں جاری ایک بیان میں مقبوضہ کشمیر کی بگڑتی ہوئی صورتحال پر سخت تشویش کا اظہار کرتے ہوئے کہا کہ بھارتی فوجیوں نے چھاپوں کے دوران ہزاروں کشمیریوں کو گرفتار کیا ہے۔

انہوں نے کہا کہ بھارت سیاسی وفود کو بیرون ملک بھیج کر اپنے جنگی جرائم کو چھپانے کی کوشش کر رہا ہے تاکہ دنیا کو ایک بارپھر جھوٹی کہانیاں سناکر گمراہ کیاجائے جبکہ مقبوضہ جموں و کشمیر میں وحشیانہ مظالم ایک ناقابل تردید حقیقت ہے۔

(جاری ہے)

ایڈوکیٹ منہاس نے کہا کہ بی جے پی کی زیرقیادت حکومت نے مقبوضہ علاقے کو ایک فوجی چھائونی میں تبدیل کر دیا ہے۔

انہوں نے کہا کہ بھارت جھوٹے پروپیگنڈے اور جابرانہ اقدامات کے ذریعے نہ تو کشمیریوں کی آواز کو دبا سکتا اور نہ ہی عالمی برادری کو گمراہ کرسکتا ہے۔ حریت ترجمان نے بھارتی فورسز کی طرف سے مسلسل چھاپوں، بلاجواز گرفتاریوں اور ہراساں کئے جانے کی مذمت کرتے ہوئے کہاکہ بھارت اسکے غیر قانونی قبضے کے خلاف مزاحمت پر کشمیریوں کو اجتماعی سزا کانشانہ بنارہا ہے ۔

انہوں نے عالمی برادری پر زور دیا کہ وہ کشمیریوں کے اقوام متحدہ کی طرف سے تسلیم شدہ ناقابل تنسیخ حق خودارادیت کی حمایت کرے۔دریں اثناء بھارتی فورسز نے مقبوضہ جموں و کشمیر میں اپنی جابرانہ کارروائیاں تیز کر تے ہوئے بڑے پیمانے پر چھاپوں کے دوران متعدد کشمیری نوجوانوں کو گرفتار کر لیا ہے۔ بھارتی فوجیوں نے ضلع پونچھ میں تقریبا 18مقامات پر چھاپے مارے جن میں آزادی پسند کارکنوں کے رشتہ داروں کو نشانہ بنایا گیا۔

اس دوران لوگوں کی ڈیجیٹل ڈیوائسز ضبط کر لی گئیں۔ بھارتی پولیس اور ریاستی تحقیقاتی ایجنسی نے بھی بوادی کشمیر میں11مقامات پر چھاپے مارے اورکئی نوجوانوں کوگرفتارکر لیا۔بھارتی فوجیوں نے ضلع راجوری کے علاقے نوشہرہ میں محاصرے اورتلاشی کی کارروائی شروع کی ۔ یہ کارروائیاں کشمیریوں کے جذبہ حریت کو دبانے کی ایک وسیع مہم کا حصہ ہیں۔میر واعظ مولوی محمد فاروق کی 35ویں برسی کے موقع پر منائے جانے والے'' ہفتہ شہادت ''کے سلسلے میں جامع مسجد سرینگر میں مقابلہ حسن قرات منعقد کیا گیا،جس میں 30سے زائد مدارس کے طلبا نے شرکت کی جبکہ میر واعظ عمر فاروق نے تقریب کی صدارت کی۔

ضلع سانبہ کے علاقے سروج میں سرحدی چوکی پربھارتی پیراملٹری بارڈر سکیورٹی فورس کے ایک اہلکار نے اپنی سروس رائفل سے گولی مار کر خودکشی کرلی۔بھارت نے کشمیری پنڈٹ اوربھارتی نژاد برطانوی اسکالرنتاشا کول کی "اوورسیز سٹیزن شپ آف انڈیا"منسوخ کر دی ہے۔بھارت مخالف ہونے کی وجہ سے ان کا او سی آئی کارڈ منسوخ کیا گیاہے ۔ بھارت میں جمہوری حقوق کی پامالیوں اور مقبوضہ کشمیرمیں انسانی حقوق کی خلاف ورزیوں پر کھل کر بات کرنے پر گزشتہ سال فروری میں انہیں بنگلوروائیر پورٹ سے واپس بھجوادیاگیاتھا۔