Live Updates

ٹام کروز کی مشن امپاسیبل 8 نے امریکا میں ریلیز سے قبل ہی 12 ملین ڈالر کمالیے

فلم امریکا سمیت دنیا کے بیشتر ممالک کے سنیما گھروں میں 23 مئی کو ریلیز کی جائے گی

منگل 20 مئی 2025 12:37

ٹام کروز کی مشن امپاسیبل 8 نے امریکا میں ریلیز سے قبل ہی 12 ملین ڈالر ..

نیویارک(اُردو پوائنٹ اخبارتازہ ترین - این این آئی۔ 20 مئی2025ء)ہالی ووڈ کے سٹار اداکار ٹام کروز کی مشن امپاسیبل 8 نے امریکا میں ریلیز سے پہلے ہی 12 ملین ڈالرز کمالیے ہیں۔میڈیا رپورٹس کے مطابق مشن امپاسیبل ابتدائی طور پر 5 ممالک میں ریلیز کی گئی ہے، جن میں جاپان، کوریا، آسٹریلیا ، نیوزی لینڈ اور بھارت شامل ہیں۔فلم امریکا سمیت دنیا کے بیشتر ممالک کے سنیما گھروں میں 23 مئی کو ریلیز کی جائے گی جبکہ چین میں اس کی ریلیز 30 مئی کو ہوگی، جسے ایک کامیابی سمجھا جارہا ہے۔

مشن امپاسیبل 8 یعنی دی فائنل ریکننگ نے ابتدائی طور پرکو 5 ممالک میں17 مئی کو ریلیز کی گئی، جس نے باکس آفس پر ریکارڈ توڑ بزنس کیا ہے۔جنوبی کوریا میں فلم کی ویک اینڈ پر ساڑھے 7 لاکھ ٹکٹ فروخت ہوئی ہیں، جو رواں سال میں کسی بھی فلم کی سب سے زیادہ ہیں، فلم نے یہاں 5 ملین ڈالرز کی کمائی کی ہے۔

(جاری ہے)

میڈیا رپورٹس کے مطابق بھارت میں ٹام کروز کی فلم نے 4 ملین جبکہ جاپان میں 2، آسٹریلیا اور نیوزی لینڈ میں 1 ملین ڈالرز کا بزنس کرلیا ہے، امید کی جارہی ہے 23 مئی کو دنیا بھر میں اور 30مئی کو چین میں ریلیز کے بعد مشن امپاسیبل کا نیا پارٹ 1 ارب ڈالرز سے زائد کی آمدنی کرلے گا، جس کی طرف اس نے سفر شروع کردیا ہے۔

امریکا میں ریلیز سے پہلے ہی فلم کی کمائی 20 ملین ڈالرز سے تجاوز کرنے کی توقع کی جارہی ہیجبکہ صرف شمالی امریکا میں اس کے اوپننگ ویک اینڈ پر 100 ملین ڈالرز کمانے کی پیشگوئی سامنے آئی ہے۔