Live Updates

نیرج چوپڑا کے بیان کے بعد ارشد ندیم کا انکے بارے میں بات کرنے سے انکار

پاکستان اور بھارت کے حالات کی وجہ سے اس چیز پر بات نہیں کرنا چاہتا، میں ہمیشہ پاک فوج کے ساتھ کھڑا ہوں : اولمپک چیمپئن

ذیشان مہتاب جمعہ 23 مئی 2025 13:27

نیرج چوپڑا کے بیان کے بعد ارشد ندیم کا انکے بارے میں بات کرنے سے انکار

لاہور (اردو پوائنٹ تازہ ترین اخبار ۔ 23 مئی 2025ء ) بھارتی ایتھلیٹ نیرج چوپڑا کی جانب سے پاک بھارت جنگ کے بعد دیئے گئے بیان کے بعد ارشد ندیم نے ان کے بیان پر کوئی بات کرنے سے انکار کردیا ہے۔

ایشین ایتھلیٹکس چیمپئن شپ کے لیے کوریا روانہ ہونے والے ارشد ندیم نے لاہور میں میڈیا سے گفتگو کی، اس دوران صحافی نے ارشد ندیم سے سوال کیا کہ نیرج چوپڑہ نے کہا ہے ان کا ارشد ندیم کے ساتھ کوئی تعلق ہے نہ دوستی جبکہ اس سے قبل وہ کچھ اور کہتے تھے، نیرج چوپڑا نے کہا تھا تھا ارشد ندیم کی والدہ میرے لیے اور میری والدہ ارشد کےلیے دعا کرتی ہیں، تاہم پاکستان اور بھارت کے درمیان حالیہ کشدگی کے بعد وہ اب لاتعلقی کا اظہار کررہے ہیں۔

اس سوال کا جواب دیتے ہوئے ارشد ندیم نے کہا کہ نیرج چوپڑا نے 90 میٹر کی تھرو کی، وہ مبارکباد کا مستحق ہے، پاکستان اور بھارت کے حالات کی وجہ سے اس چیز پر بات نہیں کرنا چاہتا، میں ہمیشہ پاک فوج کے ساتھ کھڑا ہوں۔

(جاری ہے)

پاکستانی اولمپئن نے موجودہ حالات میں بھارتی حریف نیرج چوپڑا سے متعلق بات کرنے سے انکار کردیا اور کہا کہ میرا مقابلہ ہمیشہ اپنے آپ سے ہوتا ہے۔

ارشد ندیم کا کہنا تھا کہ ماں باپ، قوم کی دعاؤں سے پیرس میں گولڈ میڈل جیتا اور نیا ریکارڈ بھی بنایا تھا، ان شااللّٰہ ایک دن 100 میٹر کی تھرو کرنے میں کامیاب ہوں گا۔

انھوں نے بتایا کہ عید کے بعد انگلینڈ جاؤں گا، میرے کوچ سلمان اقبال بٹ بھی میرے ساتھ جائیں گے، ورلڈ ایتھلیٹکس چیمپئن شپ کی تیاری کرنی ہے۔