پاکستان اور برکینا فاسو کے درمیان تجارتی و اقتصادی تعلقات کے فروغ پر اتفاق

اسلام آباد(اُردو پوائنٹ اخبارتازہ ترین - این این آئی۔ 23 مئی2025ء)وفاقی وزیر تجارت جام کمال خان سے پاکستان میں برکینا فاسو کے نامزد سفیر محمدی کابورے نے ان کے دفتر میں ملاقات کی، یہ ان کا پاکستان کا پہلا سرکاری دورہ تھا۔ سفیر کابورے تہران میں مقیم ہیں اور وہیں سے پاکستان کے لیے سفارتی خدمات انجام دے رہے ہیں۔ملاقات میں دونوں رہنماؤں نے دوطرفہ تجارت کے فروغ اور اقتصادی تعاون کو مزید مستحکم کرنے کے طریقوں پر تبادلہ خیال کیا۔

سفیر کابورے نے پاکستان میں برکینا فاسو کا مستقل سفارتی مشن قائم کرنے کی خواہش کا اظہار کیا، جس سے ظاہر ہوتا ہے کہ برکینا فاسو اسلام آباد کے ساتھ تعلقات کو مزید گہرا کرنے کا خواہشمند ہے۔وفاقی وزیر تجارت جام کمال خان نے برکینا فاسو کے سفیر کو دعوت دی کہ وہ اگست میں کراچی میں منعقد ہونے والی فوڈ ایگ (FoodAg) نمائش میں شرکت کے لیے ایک کاروباری وفد پاکستان بھیجیں۔

(جاری ہے)

انہوں نے اس بات پر زور دیا کہ اس قسم کے تبادلے دونوں ممالک کے درمیان تعاون اور تجارت کے نئے مواقع پیدا کرنے میں اہم کردار ادا کرتے ہیں۔جواباً، سفیر کابورے نے اپنے ہم منصب کی جانب سے نیک خواہشات کا پیغام دیا اور وزیر تجارت جام کمال کو برکینا فاسو کا دورہ کرنے کی دعوت دی۔ انہوں نے 7 سے 11 جون تک برکینا فاسو میں ہونے والے کاروباری فورم میں پاکستان کی شرکت کی درخواست بھی کی، جو تجارتی مواقع اور شراکت داریوں کے فروغ کے لیے منعقد کیا جا رہا ہے۔

وزیر تجارت نے قلیل وقت کی نشاندہی کرتے ہوئے یقین دہانی کرائی کہ پاکستانی کاروباری نمائندوں کو بھیجنے کی بھرپور کوشش کی جائے گی۔ اگر جون میں شرکت ممکن نہ ہو تو ایک الگ تجارتی وفد بعد میں بھیجنے کی تجویز بھی دی گئی۔جام کمال خان نے کہا کہ دونوں ممالک کے درمیان موجودہ تجارتی حجم ناکافی ہے اور اس میں اضافے کے لیے نئے شعبوں کی تلاش ضروری ہے۔

انہوں نے بتایا کہ پاکستان افریقی ممالک کو کم لاگت ٹریکٹرز اور زرعی مشینری برآمد کر رہا ہے اور برکینا فاسو کے ساتھ بھی اس نوعیت کے تعاون کی بڑی گنجائش موجود ہے۔علاقائی چیلنجز کے حوالے سے، سفیر کابورے نے اپنے ملک میں سیکیورٹی مسائل کے حل کے لیے پاکستان سے مدد کی درخواست کی۔وزیر تجارت نے اس حوالے سے اظہارِ یکجہتی کرتے ہوئے کہا کہ پاکستان افریقہ میں امن اور ترقی کے لیے پرعزم ہے۔آخر میں، وزیر تجارت نے حالیہ لاہور ایکسپو میں افریقہ سے آئے ہوئے 200 سے زائد مندوبین کی شرکت کو سراہا اور اسے پاکستان اور افریقی ممالک کے درمیان بڑھتے ہوئے تجارتی و سرمایہ کاری روابط کی علامت قرار دیا۔