شدید طوفانی موسم نے تباہی مچا دی، متعدد افراد جاں بحق

اسلام آباد، راولپنڈی، لاہور سمیت ملک کے کئی شہروں میں شدید طوفانی موسم کے باعث دن کے وقت میں ہی اندھیرا چھا گیا

محمد علی اتوار 25 مئی 2025 00:16

لاہور(اُردو پوائنٹ اخبارتازہ ترین۔ 24 مئی2025ء) شدید طوفانی موسم نے تباہی مچا دی، متعدد افراد جاں بحق۔ تفصیلات کے مطابق ہفتے کے روز اسلام آباد، خیبرپختوںخواہ اور پنجاب کے شہریوں کو غیر معمولی اور خوفناک موسمی صورتحال کا سامنا کرنا پڑا۔

اسلام آباد، راولپنڈی، لاہور سمیت ملک کے کئی شہروں میں شدید طوفانی موسم کے باعث دن کے وقت میں ہی اندھیرا چھا گیا۔

غیر معمولی موسمی صورتحال کے باعث موٹرویز کو بھی کئی مقامات پر بند کرنا پڑا۔ شدید بارش اور آندھی طوفان کی وجہ سے گرمی کی شدت تو کم ہو گئی، تاہم جانی و مالی نقصان بھی ہوا۔ پنجاب کے پروونشل ڈیزاسٹر مینجمنٹ اتھارٹی نے صوبہ بھر میں شدید آندھی وطوفان کے باعث ہونے والے نقصانات بارے ابتدائی رپورٹ جاری کردی ۔

(جاری ہے)

بتایا گیا ہے کہ آندھی و طوفان کے باعث 8 افراد جاں بحق اور 45 زخمی ہوئے۔

راولپنڈی میں1 ، جہلم 3 ، شیخوپورہ 1 ، ننکانہ صاحب 1 ، سیالکوٹ 1 اور میانوالی میں 1 شہری جاں بحق ہوا ۔ اموات بوسیدہ مکانات کے گرنے اور غیر محفوظ مقامات پر ہونے کے باعث ہوئیں ۔ طوفان کے باعث متعدد کچے اور بوسیدہ مکانات کو بھی نقصان پہنچا ۔ لاہور میں بھی درختوں کے گرنے اور سولر پینلز کو نقصانات کے واقعات بھی رپورٹ ہوئے ۔ زخمیوں کو بہترین طبی امداد فراہم کرنے کی ہدایت کرتے ہوئے صوبہ بھر کے کمشنرز،ڈپٹی کمشنرز اور ریسکیو اداروں کو الرٹ رہنے کے احکامات جاری کر دئیے گئے۔

1122 سمیت دیگر ریسکیو ادارے مشینری سمیت عملے کو الرٹ رکھنے کی ہدایت کرتے ہوئے صوبائی کنٹرول روم سمیت تمام اضلاع کے ڈسٹرکٹ ایمرجنسی آپریشن سنٹرز کو بھی الرٹ کر دیا گیا۔ پی ڈی ایم اے کنٹرول روم میں صورتحال کی مانیٹرنگ 24/7 جاری ہے۔ شہریوں سے التماس کی گئی ہے کہ خراب موسم کے الرٹس کے مطابق غیر ضروری سفر سے گریز کریں ۔ بجلی کے کھمبوں اور لٹکتی تاروں سے دور رہیں، آسمانی بجلی سے بچاو کیلئے محفوظ مقامات پر رہیں، بجلی کی گرج چمک اور طوفانی صورتحال میں کھلے آسمان تلے ہرگز نہ جائیں ، بچوں کا خاص خیال رکھیں انہیں بوسیدہ عمارتوں کے قریب ہرگز نہ جانے دیں، ایمرجنسی کی صورتحال میں پی ڈی ایم اے کی ہیلپ لائن 1129 پر رابطہ کریں۔