وفاقی وزیر احسن اقبال کا دیامیر بھاشا ڈیم سمیت تمام آبی منصوبوں کو ترجیحی بنیادوں پر فنڈز دینےکا اعلان

لاہور ( اردوپوائنٹ اخبار تازہ ترین۔ آئی پی اے ۔ 24 مئی 2025ء ) وفاقی وزیر برائے منصوبہ بندی احسن اقبال نے کہا ہے کہ بجٹ بنانے میں آئی ایم ایف کا کوئی دباؤ نہیں، عوا م پر کوئی بوجھ نہیں ڈالا جائےگا، بھارت کی آبی جارحیت کا مقابلہ کرنے کیلئے تیار ہیں۔ انہوں نے لاہور میں تقریب سے خطاب کرتے ہوئے کہا کہ پاکستان کو ٹیکنالوجی کے شعبے میں بھی بھارت پر برتری حاصل ہو گئی ہے، ہم جدید ٹیکنالوجی کے ذریعے بھارت کے جدید طیارے بھی گرا سکتے ہیں۔

احسن اقبال نے کہا کہ وزیراعظم کے بیرون ملک دورے اور عید کی وجہ سے بجٹ میں تاخیر ہوئی۔ آئی ایم ایف کا کوئی دباؤ نہیں عوا م پر کوئی بوجھ نہیں ڈالا جائے گا۔ وفاقی وزیر احس اقبال نے دیامیر بھاشا ڈیم سمیت تمام آبی منصوبوں کوترجیحی بنیادوں پر فنڈز دیئے جانے کا اعلان کرتے ہوئے کہا کہ بھارت کی آبی جارحیت کا مقابلہ کرنے کیلئے ہمہ وقت تیار ہیں، پی ٹی آئی اپنے بانی کی پالیسیوں کی وجہ سے تنہا رہ گئی ہے، حکومت ایسا کچھ نہیں کرے گی جس سے قومی اتحاد متاثر ہو۔

(جاری ہے)

آئی ایم ایف کا وفد حکومت کے اقدامات سے مطمئن ہو کر گیا ہے۔ بجٹ بنانے میں آئی ایم ایف کا کوئی دباؤ نہیں، عوا م پر کوئی بوجھ نہیں ڈالا جائےگا۔ دوسری طرف پاکستان اور عالمی مالیاتی فنڈ (آئی ایم ایف) کے درمیان آئندہ مالی سال کے بجٹ اہداف پر مکمل اتفاق رائے نہ ہوسکا، جس کے بعد آئی ایم ایف کی جانب سے نئے مالی سال کے بجٹ پر مذاکرات جاری رکھنے کا اعلان کیا گیا ہے، آئی ایم ایف مشن کا دورہ پاکستان مکمل ہوچکا ہے جس میں مہنگائی میں کمی، ٹیکس آمدن میں اضافے اور اصلاحات جاری رکھنے پر زور دیا گیا، آئی ایم ایف وفد کا دورہ پاکستان مکمل ہونے پر اعلامیہ جاری کردیا گیا۔

آئی ایم ایف اعلامیہ میں کہا گیا ہے کہ پاکستانی حکام کے ساتھ آئندہ مالی سال کے بجٹ پر اتفاق رائے کیلئے آنے والے دنوں میں مذاکرات جاری رہیں گے، آئی ایم ایف وفد کا دورہ پاکستان 19 مئی کو شروع ہوا، آئی ایم ایف وفد کی قیادت نیتھن پورٹر نے کی، پاکستان کے ساتھ حالیہ معاشی صورتحال، قرض پروگرام پر عمل درآمد اور آئندہ بجٹ پر مذاکرات ہوئے، پاکستان کے ساتھ مذاکرات تعمیری رہے۔

آئی ایم ایف کا اعلامیہ میں کہنا ہے کہ پاکستان نے مالی استحکام اور سماجی اخراجات کے تحفظ کا عزم دہرایا آئندہ مالی سال کے دوران پرائمری سرپلس جی ڈی پی کے 1.6 فیصد تک لے کر جانے پر اتفاق ہوا، زرمبادلہ ذخائر کی بحالی اور شرح مبادلہ میں لچک لانا ہو گی، اصلاحات کیلئے پاکستانی حکام پراعتماد ہیں، پاکستان نے مالیاتی استحکام اور پالیسیوں کے تسلسل کیلئے عزم کا مظاہرہ کیا ہے، پاکستان کے ساتھ بجٹ کی تجاویز پر مشاورت ہوئی، مشاورت کا مقصد یہی تھا کہ 2024ء کے قرض پروگرام میں اصلاحات پر عمل درآمد جاری رہے۔