وفاقی وزیر محمد حنیف عباسی کی سعودی سفیر سے ملاقات ، باہمی دلچسپی کے امورپر تبادلہ خیال

اسلام آباد (اُردو پوائنٹ اخبارتازہ ترین - اے پی پی۔ 26 مئی2025ء) وزیر ریلوے محمد حنیف عباسی نے پیر کو سعودی عرب کے سفیر نواف بن سعید احمد المالکی سے ملاقات کی جس میں دونوں رہنمائوں نے پاکستان اور سعودی عرب کے باہمی دلچسپی کے امور، دوطرفہ تعاون، سرمایہ کاری اور دیگر اہم شعبوں میں تعلقات کو مضبوط بنانے کے لیے تبادلہ خیال کیا۔ملاقات میں دونوں فریقین نے تاریخی، مذہبی اور اقتصادی حوالے سے پاکستان اور سعودی عرب کے دیرینہ تعلقات کو سراہا اور اس بات پر اتفاق کیا کہ یہ تعلقات دونوں ممالک کے عوام کی خوشحالی اور ترقی کے لیے نہایت اہم ہیں۔

وزیر ریلوے محمد حنیف عباسی نے کہا کہ سعودی عرب پاکستان کا کلیدی شراکت دار ہے اور دونوں ممالک کو چاہیے کہ اپنے تعلقات کو نئی بلندیوں تک لے جائیں۔

(جاری ہے)

وزیر ریلوے نے سعودی عرب میں کام کرنے والے لاکھوں پاکستانیوں کی مالی معاونت (ریمیٹنس) کو پاکستان کی معیشت کے لیے نہایت اہم قرار دیا اور کہا کہ یہ مالی وسائل ملک کی ترقی میں کلیدی کردار ادا کر رہے ہیں۔

مزید برآں انہوں نے پاکستانی زائرین کی جانب سے ہر سال مقدس مقامات پر حج و عمرہ کی ادائیگی کو دونوں ملکوں کے مذہبی اور ثقافتی تعلقات کی مضبوطی کی علامت قرار دیا۔ملاقات میں وزیر ریلوے نے ریلوے سیکٹر میں سعودی عرب کے ساتھ تعاون بڑھانے، تجارتی اور سرمایہ کاری کے مواقع کو فروغ دینے پر خاص زور دیا۔ انہوں نے کہا کہ ریلوے انفراسٹرکچر کی ترقی دونوں ملکوں کی معیشت کو تقویت دے گی اور خطے میں تجارت کے فروغ میں اہم کردار ادا کرے گی۔

سعودی سفیر نواف بن سعید احمد المالکی نے پاکستان کی ترقی میں سعودی عرب کی دلچسپی کا اعادہ کیا اور کہا کہ دونوں ممالک کے درمیان تعاون کو ہر شعبے میں بڑھانے کے لیے مشترکہ کوششیں جاری رہیں گی۔ انہوں نے سرمایہ کاری کے فروغ، تجارتی تعلقات کو مستحکم کرنے اور عوامی فلاح و بہبود کے منصوبوں پر بھی بات چیت کی۔وفاقی وزیر ریلوے نے کہا کہ پاکستان اور سعودی عرب کے درمیان تعلقات صرف دو ملکوں کے درمیان نہیں بلکہ ایک عظیم بھائی چارے اور مشترکہ مفادات پر مبنی ہیں جنہیں مضبوط کرنا وقت کی ضرورت ہے۔

انہوں نے اس عزم کا اعادہ کیا کہ پاکستان سعودی عرب کے ساتھ ہر شعبے میں قریبی تعاون چاہتا ہے اور مستقبل میں بھی تعلقات کو فروغ دینے کے لیے کوشاں رہے گا۔ملاقات کے دوران مختلف شعبوں میں مشترکہ منصوبوں اور سرمایہ کاری کے مواقع پر بھی تبادلہ خیال کیا گیا تاکہ دونوں ملکوں کی ترقی میں مزید تعاون ممکن بنایا جا سکے۔