بھارت کا جوہری صلاحیت کے حامل اور کم فاصلے تک مار کرنے والی بیلسٹک میزائلوں پرتھوی ٹو اور اگنی ون کا تجربہ

دہلی(اردوپوائنٹ اخبارتازہ ترین-انٹرنیشنل پریس ایجنسی۔19 جولائی ۔2025 )بھارت نے جوہری صلاحیت کے حامل اور کم فاصلے تک مار کرنے والی بیلسٹک میزائلوں پرتھوی ٹو اور اگنی ون کا کامیاب تجربہ کیا ہے بھارتی ذرائع ابلاغ نے وزارت دفاع کے حوالے سے بتایا ہے کہ تجربہ ریاست اڑیسہ کے علاقے چندی پور میں واقع انٹیگریٹڈ ٹیسٹ رینج (آئی ٹی آر) سے کیا گیا ہے.

(جاری ہے)

بھارتی وزارت دفاع کا کہنا ہے کہ یہ کامیاب تجربہ سٹریٹجک فورسز کمانڈ کی نگرانی میں کیے گئے ہیں اور اِن میں تمام عملی اور تکنیکی پہلوﺅں کی تصدیق کی گئی وزارت دفاع کی جانب سے جاری کردہ اعلامیے کے مطابق کم فاصلے تک مار کرنے والی بیلسٹک میزائلوں، پرتھوی ٹو اور اگنی ون کو 17 جولائی کو اڑیسہ کے شہر چندی پور میں انٹیگریٹڈ ٹیسٹ رینج سے کامیابی کے ساتھ لانچ کیا گیا ان لانچز میں تمام عملی اور تکنیکی پہلووں کی کامیابی سے تصدیق کی گئی ہے.

وزیر دفاع راج ناتھ سنگھ نے اس کامیابی پر انڈین فوج، ڈیفنس ریسرچ اینڈ ڈیویلپمنٹ آرگنائزیشن (ڈی آر ڈی او) اور وزارت دفاع کو خراج تحسین پیش کیا اور کہا کہ یہ ایک قابل ذکر کامیابی ہے یاد رہے کہ دو روز قبل بھارت نے لداخ میں ”آکاش پرائم میزائل“ کا تجربہ کیا تھا وزارت دفاع کے مطابق انڈین فوج کے لیے تیار کیا گیا یہ جدید فضائی دفاعی میزائل نظام 4,500 میٹر سے بلند علاقوں میں کام کرنے کی صلاحیت رکھتا ہے.

وزارت دفاع نے ایک بیان میں کہا تھا کہ انڈیا نے 16 جولائی کو لداخ میں آکاش پرائم میزائل کے ذریعے دو تیز رفتار بغیر پائلٹ والے فضائی اہداف کو ہائی آلٹیچیوڈ (بلندی) پر کامیابی سے تباہ کرکے ایک اہم سنگِ میل عبور کیا یہ آکاش ہتھیار اس نظام کا جدید ورڑن ہے جو انڈین فوج کے لیے تیار کیا گیا ہے. ان میزائلوں کے کامیاب تجربے انڈیا اور پاکستان کے درمیان 7 سے 10 مئی تک جاری رہنے والی عسکری کشیدگی کے دو ماہ بعد سامنے آئے ہیں پرتھوی ٹو میزائل کی رینج تقریباً 350 کلومیٹر ہے اور یہ 500 کلوگرام تک ہتھیار لے جانے کی صلاحیت رکھتا ہے یہ میزائل روایتی اور جوہری دونوں طرح کے وار ہیڈز لے جانے کے قابل ہے اگنی ون میزائل کی رینج 700 سے 900 کلومیٹر تک ہے اور یہ 1,000 کلوگرام تک کا وار ہیڈ لے جا سکتا ہے یہ دونوں میزائلیں انڈیا کی جوہری دفاعی صلاحیت کا اہم حصہ ہیں.